«Ттул халкьуннал балайрду ва къавтIавуртту»

МахIачкъалаллал Культуралул управления­лучIасса Аьрасатнал халкьуннал аслийсса культуралул центрданул филиаллай хьунни аслийсса культуралул ва фольклорданул фестиваль «Ттул халкьуннал балайрду ва къавтIавуртту».

Роспотребнадзорданул санитар-эпидемиологиялул тIалавшиннардайн бувну, фестиваль хьунни манзилданул журалий.
Фестивальданувух гьуртту хьунни республикалул районнаясса ва шагьрурдаясса коллективру.
Фестивальданул сакиншиннаралсса бувну бур МахIачкъала шагьрулул Культуралул управлениялул, Дагъусттан Республикалул Халкьуннал творчествалул къатлул чIаравбацIаврийну.

ЦIу дуккан дурссар культуралул ряхрайра къатри

«Культура» тIисса цIа­нилусса нацпроектрал лагрулий ялату нанисса шинал бакьин бувссар ряхра шяраваллил магьирлугърал къатта.
Ва шинал ми давурттан аьмну итабавкьуну бур 65 млн къурушрал: федерал, республикалул ва муниципал бюджетирттава. Ряхвагу къатлува кIива тIивтIуссар, махъми декабрьданул ахирданий тIитIинсса пикри бур.

– Ва шинал «Культура» нац­­проектрал лагрулий бакьин був­ссар Лакрал райондалий­сса ГьунчIукьатIрал шяраву­сса, УнцIукIуллал райондалийсса УнцIукIуллал шяравусса, Лаващиял райондалийсса Лараймур Арши шяравусса, Шамильский райондалийсса Хучада шяраву­сса, Къарабудахккантуллал райондалийсса Доргели ва Какашура шяраваллавусса культуралул къатри. Миннува кIира шяраву (УнцIукIул ва Лараймур Арши) шадлугърай тIивтIуссар культуралул къатри. Вайми мукьрагу шяраву мюрш-кьюршсса давуртту дуван лирчIун дур, – тIий, буслай бур ДР-лул культуралул министрнал буржру чIумуйну биттур буллалисса Зарема Буттаева.

«ЦIушинал открыткарду»

Дагъусттан Республикалул Культуралул министер­с­т­­ва­лул ва Республикалул Халкьу­ннал творчествалул къатлул сакиншиндарайну, вай цIушинал гьантрай щаллу дуллай байбивхьуссар цIусса онлайн-проект – барча бавурттал Республикалул фестиваль «ЦIушинал отк­рыткарду».
Инстаграмрайсса официал страницалий вания тиннай гьарца кьини ккаккан бю­хъавантIиссар республикалул халкьуннал творчествалул коллективирттал ва таксса балайчитурал видео-барчабавуртту.

– ЦIушинал байран мудангу ккаллий дувай кулпатрал байрандалун. Жувагу, циняв цачIун хьуну, ца хъунмасса кулпатраву кунна, чIяву миллатру бусса Дагъусттаннал халкьуннал, хьунадакьинну ЦIушинал байран. Гьарца кьини жува хьунабакьланну соцсетирдай, кувннащал кувннал байрандалул хIал-макьу ва жулва миллатирттал культуралул авадансса ирс бачIлай, – тIий бур Республикалул Халкьуннал творчествалул къатлуву.
Фестивальданий гьур­тту хьунтIиссар республикалул шагьрурдаясса ва шяраваллава­сса къавтIалт ва балайчитал.