Махъсса цаппарасса нюжмардал мутталийсса авазами хавардавасса цаннин ккалли буван бучIир Каспийскалийсса ва Избербашрайсса агьалинал хIачIай щинал тагьар ххишала дакъа оькки шаву. ДакIнийн бутан, му мукун хьуссар, ноябрьданий лачIлай лахъи ларгсса гъараллу сававну, Талгинка неххавасса ва КОР-данувасса чапалсса щин агьалинал къатравун наними щин салкьи хъанахъисса «Рыбье» тIисса бярув дагьну.
Ва кIанугу хIисавравун лавсун, Роспотребнадзорданул Дагъусттаннаймур Управлениялул гуж дурну дур агьалинал къатравун нани дурсса щинал ялувсса лабораториялул зумувнусса бацIаву.
Ноябрьданул 18-нния декабрьданул 11-ннин Каспийскалий бувну бур щинал 244 проба – микробиологиялул ва санитар-химиялул ккаккиярттайнсса – миннува 63, 5% бур дикIан аьркинсса кьарал дакъасса, СанПиН-лул тIалавшиннардан жаваб къадуллалисса. Избербашрай мукунна дурну дур лабораториялул мониторинг, микку бувсса 234 пробалия 72,9% бур хасъсса тIалавшиннардан жаваб къадуллалисса.
Чапалсса щин сававну инфекциялул азарду сукку шаврил хьхьичIалу кьукьаву мурадрай, Роспотребнадзорданул Дагъусттаннайсса Управлениялул «шагьру Каспийск» ва «шагьру Избербаш» администрациярттал бакIчитурайнсса Постановление чивчуну бур, цилгу крандалува нанисса щин ишла даврин къадагъа дихьлахьисса.
Административ низам лиян даврийн бувну, Роспотребнадзорданул 8 протокол сакин бувну бур – аьмну 70 азарда къурушрансса. Мукунма ДР-лул прокуратуралул органнайн цимирагу информация дуркIун дур щинал тагьар оькки шаврийн бувну гьан дурсса.
ХIасул хьусса оьккисса тагьарданийн бувну, ДР-лул ХIукуматрал СПК-рал ирглий дакъасса батIавурттай бувну бур хасъсса хIукмурду, цал хIасилнугу хIачIайсса щинал даража къулай шаву хьун аьркинсса.
Тагьар Роспотребнадзорданул Дагъусттаннайсса Управлениялул цила бургаврилун ларсун дур.
