Игьалагай чIун дучIан дурар

МахIачкъалалив хIакинтурахь барчаллагь тIутIисса баннердавух дур Москавуллал О. М. Филатовлул азарханалий зузисса анестезиолог-реаниматолог ХIусман ХIусмановлул суратращалсса билбордгу.


Бувар коронавирусрал азарданул ххутIив уттигу хIура-чIула буклан. ЦIалхъансса хъаплища агьали ххассал буллай, медициналул зузалтрангу хьхьу-кьини ковидрал къашавайминнал чIарату хIура хьун­сса чара бакъар. Ва ялагу, ми агьалинан бюхъайссаксса кумаг хьувча тIий, чIун ляркъуну, маслихIатру буллай, консультациярду дуллай бур.


[dropcap]М[/dropcap]оскавуллал О. М. Филатовлул цIанийсса 15-мур азарханалий хIакин-анестезиологну зузисса ХIусманов ХIусманнуйн бувкссар ва азарданухьхьун биривсса чIявусса дагъусттанлувтал. Ванал цала аякьалийн лавсун, чIявуссаннал чIарав авцIунни ва уттигу ацIлайнува ур. Ва цувагу азар къизгъинний, «ятIул зоналувур» зий усса­гу коронавирусрал азар сукку хьуния мукьах. Иривссар цувагу ва азарданул цIалхъансса хъаплихьхьун. Цала тIийкун, цайвагу ккавкссар азарданул хIал.

Социал сетирдай ванал телефондалул номер бур, гьарманаща оьвкуну, цIухху-бусу буван бюхълай бур. Жу уттинингу ванаяту чивчуссия «Илчилий», бувсъссия «Associated Press» тIисса Американал машгьурсса агентс­твалул фотожурналист Павел Головкиннул ХIусманнущал отделениялий, ванал даврил хъирив авцIуну, дуллалимур суратирттайн ласлай, кIива гьантта бувшиву ва ххуйсса, асар хьунну дюххансса фоторепортаж дуршиву. Бувсъссия ва гьарманан шайссаксса кумаг буван хIадурну ушиву ва буллайгу ушиву.

[dropcap]М[/dropcap]оскавливсса Мариян Илиясовал цIанийсса «Дараччи» фондрал душваврал маслихIат бувна, МахIачкъала шагьрулул администрациялийн бувккун, ХIусманнулмур сурат дусса баннергу лахъан къабучIиссарив, Дагъусттаннал агьалинангу хавар хьувча укун итххявхсса, ка сававсса хIакин тIисса мурадрай. Ва пик­ри ххуй бивзсса Дагъусттаннал БакIчинал ва ХIукуматрал администрациялул Виваллил политикалул управлениялий отделданул хъунмурну зузисса 1-мур ЦIувкIратусса Наида Рамазанова хъирив бувккун, бахшиш хьувча тIий, лархъуна ХIусманнул сурат дусса баннергу ХIамзатовлул цIанийсса кIичIираву.

[dropcap]М[/dropcap]архри ЧIурттащатусса ХIусман 1980 шинал Хасавюр­тлив увну ур. Ппу Аьбдулмалик экскаваторданул водитель ур, нину Раиса – техник-технолог. МахIачкъалалив 1997 шинал 85-мур школа-гимназия къуртал бувайхту, ва дуклан увххун ур Дагъусттаннал паччахIлугърал медициналул университетравун, оьрчIал хIакиншиву дуккин. Мукьра шинава лавгун ур армиялийн. Аьралий бурж лавхъун махъ дуклан увххун ур Самаралийсса Аьралий-медициналул институтравун. 2003-2004 шиннардий анестезиологиялул ва реаниматологиялул касму лахьлахьи­сса интернатура къуртал бувну бур, медициналул къуллугърал хъунама лейтенантнал аьралий чингу ларсун. 2008-2011 шиннардий тIурча, Аьралий-медициналул академиялуву клиникалул ординатура къуртал бувну бур, кIара анестезиология ва реаниматология касму магьир дуван.

АцIния кIира шинал лажиндарай билаятрал личIи-личIисса гарнизоннай зий, ванал аьралий хIакиннал ва каялувчинал биялсса опытгу салкьи хьуну бур. Зий ивкIун ур нигьачIисса кIанттурдайгу, баларду, катастрофарду хьусса цIараву. 2013 шинал январь зуруй цува хушрай медициналул къуллугърал майорнал чиндалуву аьралий медицина кьариртун, граждан медициналуву зун ивкIун ур. 2014 шинал айивхьуну ур О.М. Филатовлул цIанийсса азарханалий (ГКБ№15) хIакин-анестезиологну зий. 2017 шиная шийнай ва азарханалий гьантлун 220 инсан кьамул увайсса приёмное отделениялул хъунаману зий, ванал цува бюхъу бусса каялувчи ушиву ккаккан бувну бур. Ва отделениялул Росатомращал уртакьну гьурттушинна дурну дур «Бережливый стационар» проектравугу. Отделениялул даврин лавай­сса кьимат бивщуну бур Москавуллал ЦIуллу-сагъшиву дуруччай департаментрал. 2019 шинал Департаментрал чулухасса ХIурматрал грамоталунгу лайкь хьуну ур. Ххаллилсса хIакин хIисаврайгу, гьунар бусса каялувчи хIисаврайгу цачIу зузиминнаву ванал хIурмат хъунмасса бур. Ва лаваймур категориялул хIакин ур. АрхIала зий ур элмийсса даврихагу, диссертациягу дуруччин хIадур хъанай ур.

[dropcap]В[/dropcap]а мудангу хьхьичIунну гьур­тту шайсса ур щалвагу Аьрасатнал ва дунияллул халкьуннал дянивсса элмийсса конференциярдай, конгрессирдай. Ва ур Европанал анестезиологтурал ккурандалул членгу (European Society of Anesthesiologists), Санкт-Петербург шагьрулул анестезиологтурал-реани­матологтурал Ассоцияциялул членгу. Гьашину, 2020 шинал, Москавуллал халкьуннал хозяйствалул ва паччахIлугърал къуллугърал академиялуву, кIул­шивуртту цIакьгу, куртIгу дуваву мурадрай, ларсун дур Здравоохранениялул менеджментнал кIулшивурттугу.

Коронавирусрал азар ппив хъанай сукку хьу­сса ппурттувува ва зузисса азарханалиягу му пасатсса цIуцIаву дирми хъин буллансса азархана бувну бур. ХIусмангу Оператив штабрал кьюкьлуву хъунмур корпусрал хъунаману (комендантну) цIакь увну ур. Ва даврий, хIакиннал касмулийн дакI тIайлану къуллугъ буллалаврихлу, ванан Аьрасатнал Федерациялул цIуллу-сагъшиву дуру­ччаврил министр М.А. Мурашкол Барчаллагьрал чагъаргу буллуну бур.

ХIусманнул ичIува чул бищай кIану-кулпат Саида, Дагъусттаннал университетраву математик-программистнал касмугу лархьхьуну, зий бур Мос­кавлив, IT-компаниялул клиентътурал сервисрал къуллугърал хъунмурну.

Уттигъанну кунма на ХIусманнухьхьун коронавирусрал вакциналул хIакъираву ци учара тIисса суал буллуссия. «Баласса азардануща ххассал буван къавхьуми литIлатIисса лахIзардал жул дакIру шан-парчари дунни, ххишала яхI буван къахьун куннасса хажалат дур жуву, маслихIат буллай ура вакцинарду бувну бурувччуну бикIан», – увкунни. Гьай-гьай, «Зунттаву увсса, хъуна хьусса акъанугу, дакI зунттурдая дуцан дуван къашай»,– тIисса ХIусман ХIусмановлущал, ва Дагъусттаннайн учIайхту, хьунабакьинсса мурад буссия жул. Ванал мажал бакъар цIанакул, хъуншагьрулул ца яла хъунмур азарханалий агьалинал цIуллушиврул ялув цIакьну авцIусса аьскар-къаралчи ур.

[dropcap]Б[/dropcap]униялттунгу, аьра­личу азарданул дяъвилий талай ур. ХIакьину «ятIул зонардаву», азар къизгъинний зузисса медициналул зузалт аьрай талатисса аьралийтуран ккаллиссар. ЛичIирив, минналми оьрмурдугу бивкIулул дазуцIухсса ба­къарив? ХIакинтурая хIакьину, кIулшивурттацIун, опытрацIун, чувшивугу аьркинну дакъарив? ХIусманнул чувшиву, сисаву, кIулшивуртту ва опыт цIанакул агьалинан хъинну бучIи ляхълай бур. Цала тIийкун, дурар игьалагай чIун дучIан.
Ялугьланну жувагу, коронавирусрал азарданияр ххув хьуну, оьр­му цила нирхиравун багьсса чIун дучIаннин. Ччяни дучIанхьуви тIисса хьулгу бивхьуну.