ЦIунилгу дайдирхьунни волонтертурал штабрал даву

Дагъусттаннай, Республикалул БакIчинал бигарду щаллу буллалисса Сергей Меликовлул хIукмулийн бувну, октябрь зурул 23-нния байбивхьуну оьрмулул 65 шинава ливчусса инсантал самоизоляциялий буссар.


Ванийн бувну, «Мы вместе» цIанилусса волонтертурал штабрал цIу дуккан дунни «горячая линия». Кумаг аьркиннаща оьвчин бюхъайссар ва номерданий: 88002003411. Утти волонтертурал кумаг буллантIиссар шаппа щябивкIсса бугьара­сса инсантуран дуки-хIачIия ва даруртту ласун, мукунма, аьркин багьларча, минначIан увцуну бучIавантIиссар участокрал хIакин ягу ми цивппа буцавантIиссар хIакинначIан. Му бакъассагу, коронавирус­рацIун бавхIусса ва цаймигу къатIааьнсса хавардал аьраттал буккан бувсса инсантуран кумаг бантIиссар хасъсса пиша лавхьхьусса психологтурал.

ЦIанасса чIумал 280-нния ливчусса дагъусттанлувтурал буллуну бур акциялуву гьуртту хьун ччисса аьрзри.
КIулну бикIан, акциялий гьуртту хьун бюхъайссар 18 шинава 50 шинавун бияннинсса, хронический азарду дакъасса ччима инсаннаща. Аьрза булун аьркинссар ва сайтрайн: htth://dobro.ru/event/1001590. Му ба­къассагу, буккин аьркинссар шанма журалул (дуки-хIачIия ва даруртту биян баврил, психологнал кумаг баврил ва медициналул зузалтран кумаг баврил) онлайн-курсру.