Ляхъан аннав чара
инсан инсансса,
Инсаннал симансса,
щяйтIан бакъасса,
Ухьурча цув инсан,
ва ур учинсса,
ЧIарав акъанигу,
хьурдай учинсса.
ЦIийшиял ХIажимурад

Ттигъанну дунияллия лавгунни аслийсса лаккучу, 33 шинай Педуниверситетраву зий ивкIсса, Неъматуллагьлул арс Камалов АьбдурахIман. Декабрьданул 10-нний ванан бартлагантIиссия 74 шин. Хъунисса вузирдал занакьулушин кIулсса АьбдурахIманнул, цайминнаха къалархьхьусса, цукуннив ца ляличIисса аькьлулул лишан дия.
АьбдурахIман Камалов ия цила багьайкунсса тарбиячигу, цIанихсса аьлимчугу, хIакь­сса педагогнал мугьру бу­сса цIивикъангу.

Педуниверситетравун ялтту уккан увкIсса, ца хъунасса дур­ккучунал увкуна: «Дахьасса дарсдихьу ухьурчагума, на педагогра тIий оьрму бутайссар цаппараннал. Амма икIайкунсса педагог хьун хъунмасса захIмат бишин багьайссар. Цила багьайкунсса педагог ниттила увну икIайссар. Педагогшиврул цила багьайсса ххуллу лякъин хъинну хъунисса аьлимтуращагума къавхьуну личIайссар», – куну. АьбдурахIманнущал архIал зий, ттун тачIав къабавссар ганая студент рязи акъа гъалгъа тIий.

---

АьбдурахIманнул бувгьуну бур физикалул яла хьхьичIунсса элмулул ххуллу. ЦIанасса физикалул теориялул хьхьичI ххуттай дур «теория элементарных час­тиц», ва мунил аьлимчуну хьунгу кIива бакI аьркинни учирчагу, къатIайлану къачIаланссар.

---

КIулсса зат бур, цIанихсса аьлим­чу шайшиву хъинну захI­мат ххираманаяту, ва оьр­мулул ххуллий хьунабакьирча хьхьичIунсса «элмулул школа». Элмулул аралувусса ххуллурду ххал буллай, учин бюхъанссар, математикалул аьлимтураву бур, хъинну жагьилну бунува, цIа дурксса. Физикалулмур ва вайми тIабиаьтрал элмурдаву тIурчан, мукунсса бакъар. Математикалул дур хъинну лази-ларкьусса, тий-шиннай хьун къабучIисса логикалул кьанунну. Вайми элмурдаву дур, дазу-зума дакъа­сса учирчагу, тIабиаьтрал хасиятру ва ххуллурду. Ххишалдаран, вайннуха зузисса аьлимтурал даймургу математикалул мазрайн дурцуну дан багьлай бур. Мунияту захIматшивугу кIилийну ххишаласса дур.

АьбдурахIманнул бувгьуну бур физикалул яла хьхьичIунсса элмулул ххуллу. ЦIанасса физикалул теориялул хьхьичI ххуттай дур «теория элементарных час­тиц», ва мунил аьлимчуну хьунгу кIива бакI аьркинни учирчагу, къатIайлану къачIаланссар. Му элмулул хьхьичIдазуйн ив­сса элмулул кандидат хьуну ия АьбдурахIмангу. Мунийн­сса захIматрал ххуллугу байбивхьуну бия Гъумучиял школалия, учительтурал сийгу, дурккуминнал кьадругу бусса Совет заманнайва.
ЦIуну паччахIшиврийн лавхъун, каялувшиву дуллан нанисса жагьилсса паччахIнал цIувххуну бур цала аькьлукарнахь:

– ПаччахIлугъ дачин дан яла бигьамур зат цири?
– Арамтурахьхьун буллуну ярагъгу, биллали бавур, ттул хъунма,– куну бур аькьлукарнал. Му жуав тIааьн къадирзун, ялагу цIувххуну бур:

– Ялагу бигьасса зат цири?
– Дуллуну агьалинахьхьун даву, гай хайрданун зузи бавур.
ПаччахIнан мугу кIу бивзун, цIувххуну бур:

– Ми затру бигьасса духьурча, захIматмур цири?
– Агьалинаву адавлугъ дачин дан, кIулшиву гьаз дан, халкь инсапшиврий тарбия бан чIярусса шинну аьркинссар, му хъинну захIматсса аьдлур.
ЧIурттахь арулва классгу бувккуну, АьбдурахIман лавгун ур дуклан Гъумучиял школалийн. Лавайми классирттаву ванан гъира багьну бур физикалух ва математикалух. Математика дишайссия Мариян Къажлаевал, физика — Эльза Парамазовал. Ца шинал хьхьичI дуклакиминная баяйва чялав оьрчIавун багьсса задачарттах­сса гъиралия, бяст-ччаллия. Миннал дяниву чIявусса математикалул задачартту байва Султанов ХIасаннул. Хъирив нанисса класс­равусса Аьб­дурахIманнунгу, Айгунов ХIасаннунгу дагьуна му цIу. Вайннал бястлий задачникрай буми задачартту буллай бачайва. Вайннал ххуйсса дус ия, аьпа бан цал, ттигъанну дунияллия лавгсса Кьурбанов Оьма­ри. Вай оьрчIру учительтурангу ххирая.
Мусил медальданий школагу къуртал бувну, АьбдурахIман увхссар Дагъусттаннал паччахI­лугърал университетрал физикалул факультетрайн. Ххюлчинмур курсирай дипломрансса элмийсса даву дан ва тIайла увккун ивкIссар Бакуйннал университетравун, академик Аьбдул МухтаровлучIан. Шикку багьайсса куццуй кьувтIуссар АьбдурахIман элементар частицардал теориялувун ва квантрал электродинамикалувун. Яла ва тема хьуссар ванал элмулул хъун ххуллул чанна цIукуну.

ЯтIул дипломгу хъиривну университет къуртал бувайхту, ва тIайла увкссар зун Казбекуллал райондалийсса Дылым шяраваллил школалийн. Хъирив шинал увцуссар армиялийн.
Армиялия увкIун махъ Аьб­дурахIман увхссар академик Мухтаровлул дуллусса рекомендациялущал Н. Бауманнул цIанийсса училищалул аспирантуралувун. Шивугу, ванал талихIран, бакIрайн агьссар Л. Д. Ландаул ученик, дунияллийх цIа ларгсса физик-теоретик Владимир Берестецкий. КутIасса мутталий ванаща бювхъуссар иян физикалул хьхьичIунсса теоретика ахттар дайсса даражалийн. Лайкьну дурурччуну элмулул кандидатшиврул диссертациягу, зун увкIссар Дагъусттаннал Физикалул институтравун.
1979 шинал зун ивкIссар Пединститутраву.

1989 шинал Москавливсса курсирдай ингилис мазгу лав­хьхьуну, 1990-1991 шиннардий зий ивкIссар Африканал билаятрай – Танзаниянаву. Ванал ххал бувссар яла бюхттулмур зунтту Килиманджаро (5881 м). КьатIаллил дуккаврил тагьаргу лархьхьуну, увкIссар ма­хъунай, гава цала педагогикалул вузравун.
МукьцIалунния лирчу­сса шиннардий Аьбду­рахIман Камаловлул канила бувкссар ацIвахъул луттирду-пособияртту, монографияр­тту, ттуршвахъул статьяр­тту ва личIи-личIисса журалул давуртту. Цайминнащал гьур­ттуну Американаву 2006 шинал итабавкьуссар 1000 лажин дусса лу ингилис мазрай.
1995 шинал АьбдурахIман, профессоргу хьуну, увчIуссар физикалул факультетрал деканну. Ва къуллугърай зийгу ивкIссар 2012 шинайн ияннин. Му мутталий АьбдурахIманнуща бювхъуссар щалва идара цIулаган бан.

ЧIал къавхьуну ванан дуллу­ссар «Почетный работник Высшей школы» тIисса цIа.
2013 шиная айивхьуну, къашавай хьуннин АьбдурахIман, дарсгу дихьлай, директорнал кумагчинугу зий уссия Каспийскаллал Энергетикалул колледж­раву.
АьбдурахIманнун хъинну ххирая гъан-маччами, дус­тал, хIадурну икIайва чIарав ацIан, шайсса ка-кумаг бан. Ванал цIа кьадрулий ва кьиматрай дакъа зумух къаласайва цума-цанналгу, къаласай утти­гу, къаласунтIиссар ялуннайгу. ЦIанил заллу мукун­сса хIурматран лайкьсса ивкIун тIий, цала узданну бувтсса оьр­мулийнугу, оьрмулуву бартбигьлай ивкIсса иширттайнугу.
Ванал оьрму лавгссар, хъунама уссил ЦIигьил Камаловлул кунма, тухумрал цIа, лакрал цIа гьаз дуллай. Дагъусттаннай ванал бивщусса кIулшиврул гьанна никирая никирайн бачинтIиссар.
Ва ия хIакьсса лакрал патриот, дазу-зума дакъа ххирая бу­ттал улча, Лакку билаят, Да­гъусттан.

Аьбиди ХIайдаев