Чярхнийсса батIаву

Декабрьданул 6-нний, ДР-лул БакIчи Сергей Меликовлул тапшурлугъ бартдигьлай, ДР-лул ХIукуматрал Председательнал буржру чIумуйну бартбигьлагьи­сса АьвдулпаттахI Амирхановлул ВКС-рал низамрай дунни Дагъус­ттаннай коронавирусрал инфекция ппив шаврил хIакъиравусса чярхнийсса батIаву.

АьбдулпаттахI Амирхановлул тIимунийну, билаятрал Президентнал тапшур бувну бур регионнайсса тагьардах бурувгун кIул дуван ссуссукьушивуртту гужлан дуван аьркинссарив ягу къааьркинссарив. «Республикалул хъунама санитар хIакиннал маслихIатрайн бувну, жура, чансса гужлангу дурну, ккаккан дуварду аьркинса ссуссукьушивуртту. Утти аьркинни гужлан дуван ми бартдигьаврил ялувбацIаву, муних дуллан аьркинни утти хъунмур къулагъас»,– кунни Амирхановлул. Мунал тIимунийну, махъсса гьантрай­сса статистикалул агьалинавун буруккин бутлай бур: цифрарду лахъ хъанай бур, гьарза хъанай бур мукунма захIматну къашавайсса ва литIлатIисса. Яла-яла захIматсса тагьар дур Бабаюртуллал, Нугъайнал, Табасараннал, УнцIукIуллал ва Ххунзахъиял районнай, мукунна Къизлардай, Хасавюртлив ва Каспийскалий.
ДР-лул Роспотребнадзорданул каялувчи Николай Павловлул бувсунни аьмну республикалий къашайшалт гьарза хъанай бушиву. МуницIунма 24 райондалий тагьар цалий дарцIуну дур, 8 райондалий тIурча, цIусса къашайшалт сияхIрайн лавсун бакъар.
Къашавайми гьарза хъанахъаврил хьхьичIалу кьукьиншиврул, Николай Павловлул тапшур бунни хъатIив, бивкIу- буккуртту буллан чансса инсантал салкьи хьуну. Агьалинан хIаллихшинну дуллалисса идарарттай чIумуя-чIумуйн дезинфекцияртту дуллан, даврия бяличIавугу дурну. Ми давур­ттал ялувбцIавурттугу дуллан, миннул отчетругу дуллан.
Мукунна къадагъа дирхьунни хьхьунил клубру, каферду, ресторанну ссят 23-нния махъ къазун. Дуккаврил идарарттаву елкарду къабуллан, оьрчIал бялахъайсса клубру лакьин.
БатIаврий ихтилат бунни мукунма ДР-лул цIуллу-сагъшиву дуруччаврил министр Жамалуттин ХIажиибрагьимовлул.
Ихтилатру бунни цайминналгу, кIантту-кIанттурдай коронавирусрал инфекциялул къашайшиврул тагьарданул хIакъираву.