Ттуршра шинавусса бюрунттал хIухчу хъин увну ур
ЦIусса Уренгойрайсса моногоспитальданул хIакинтурал ттуршра шинну хьусса инсанталгума коронавирусрал азардануща ххассал буллай бур. Санитар авиациялул иян увну ур занангу, зат дукангу къахъанахъисса, захIматсса къашайшала, ттуршра шинал оьрмулувусса балугъчи ва бюрунттал хIухчу Илику Салиндер. «Ва угьарасса инсан ттун, бурулданул ваза куна, мугъаятну хъин уван багьлай бия, личIину сукку-кьютIу улланагу бучIину бакъая», – тIий ур хIакин-пульмонолог Александр Пушников. Ненецнал маз бакъа къакIулсса къужлун таржумачигума угьан багьну бур. Илику, хъингу увну, шавай итаавкьуну ур.
Къиргъизнаву гьивхьхьул цIа даххана дувантIий бур
Къиргъизнал хъуниминнал баян бунни гьивхьхьуйн грекнал гьивхь («греческий орех») тIий цIакь шаву къатIайласса зат бушиву, му цIа даххана дувансса хIукму бушиву. Тайннал депутатътал бур, тарихрал бусалалийн бувну, Александр Македонскийл Арсланбоб тIисса неххацIсса хIатур (ва уттисса Къиргъизия бусса кIанур) гьивхь Грециянавун лавсун лавгссар тIий. Къиргъизнаву гьивхьхьул вацIрахь 45 азарда гектар дусса дур.
АьчIа дирхьуну дур, къуллугъирттай хъами чIявусса бунутIий
Парижуллал мэриялий 90 азарва евролунсса аьчIа дирхьуну дур чиваркIуннал ихтиярду ссуссукьу дуваврихлу, къуллугъирттай хъами чIявусса битаврихлу. 2013 шинал Франциянаву цIакь дурну дур каялувшиву дуллалисса структурардай 60 процентраяр гьарзасса я чиваркI, я хъами битлан къабучIисса закон, яни, я арамтал, я хъами чIяву буван къабучIисса. 2018 шинал Парижуллал мэриялий каялувчиталну бивтун лявкъуну бур 11 хъамитайпа ва 5 адамина. Гьаннайсса, чиваркI чанну бур. Мэр Анн Идальгол баян бувну бур аьчIа цилла дулунтIишиву. ХIатта му хIукмулия цуппа рязийну бакъанугу.
