Ноябрь зурул 27-нний Дусшиврул къатлуву хьунни Дагъусттаннал Национал политикалул ва диндалул иширттал министерствалун 30 шин шаврин хас дурсса шадлугъ.
Юбиляртал барча буван бавтIун бия хIукуматрал къуллугъчитал, динийсса ва жяматийсса ккураннал вакилтал. Бия цайми регионная бувкIсса хъамалгу. Миннацрал даврияту гьарза-гьартану бувсуна министр Энрик Муслимовлул. Ванал кIицI лавгунни республикалий чIяву миллатирттал ва диннал дянив нахIушиву ядуван хъунмасса бутIа бивхьушиву Миннацрал ва хIакьинусса кьинигу циняв идарарттащал хIала-гьурттуну зий бушиву. Дагъусттаннал хъунаманал цIанияту коллектив барча бувна вице-премьернал къуллугъ чIумуйну бартбигьлагьисса Аьбдулмуслим Аьбдулмуслимовлул.
Вара кьини МахIачкъалалив Миннацрал юбилейран хас дурсса элмийсса конференциялул давугу дайдирхьуна. Ванил тема дия «Миллатирттал дянивсса арарттал агьамсса масъалартту». Тиккусса гьануми ихтилатругу бия Аьрасатнаву чил миллатирттал ва диннал хIурмат буну къуццу тIун аьркиншиврия, дусшиву дургьуну бикIан аьркиншиврия. Ва конференциялий ихтилат бувсса Коми Республикалул национал политикалул министр Галина Габушевал бувсуна Дагъусттаннал диаспора гьарцагу дуллалисса давурттавух чялишну хIала буххайшиву, Воркута шагьрулий дагъусттанлувтурал сипталийну Исламрал рувхIанийсса центр буллай бушиву.
