Гьар шинах шайсса Аьрасатнал Федерациялул Президент Владимир Путиннул хъуннасса пресс-конференция гьашину хьунни декабрьданул 17-нний. Му ккаккан дуллай бия «Россия-1», «Россия-24», Цалчинмур канал, НТВ ва «Мир» каналлавух ва мукунна «Маяк», «Вести ФМ» ва «Радио России» тIисса радиостанциярттавух.

---

Президентнал хьхьичIмукъул хъирив мунал пресс-секретарь Дмитрий Песковлул махъ буллунни «Магадан» ГТРК-лул вакил Людмила Щербаковахьхьун. Мунил суал бия: «Ларгсса шин ххуй-хъинсса дияв ягу дакъаяв ?». Му суалданухьхьун жаваб дуллай, Президентнал бувсунни гьашину коронавирусрал къашавай хьуну бивкIшиву 70 млн агьалиная ливчусса ва муния экономикалун хьусса зараллая.

В. Путин: ВВП яларай дагьну дур 3,6 %, ми чанссар Европанал билаятирттайминнуяр ва США-налмунияр.
ЖучIара промышленностьрал хъус дуккан даву чан хьу­ссар 3 %. Шяраваллил хозяйствалул бакIлахъия ларсун дур 1,8-2 % ххину. Банкрал бутIуву ялундукIу (прибыль) хьуну дур 1 триллион ва 300 млрд къуруш. Агьалинал доходру чан хьуну дур 3 %.
Даву дакъа ливчIми шинал дайдихьулий бия 4,7 %, цIана тIурча, 6,3 % хьуну бур.
ПаччахIлугърал бурж чан хьуну бур 10 млрд къурушрал.

«Россия» ВГТРК-лул вакил А. Пет­ровлул суал буллунни коронавирусрал пандемиялул хIакъираву. «Цуксса хIадурну диркIссар Аьрасатнал цIуллушиву дуруччаврил система коронавирусращал талан, хьуссарив мунища цила бурж бартбигьин му талатавриву?».
В. Путин: Коронавирусращал талан хIадурну къадиркIссар дунияллий царагу цIуллушиву дуруччаврил система. Мукун­сса система дурагу дакъассар. Амма цачIу дирхьуну ххал дур­сса чIумал, чIалай дур жулламур система диркIшиву ца яла тIайламур, мюнпатну зузимур.

Яла ччясса чIумуй жучIава хIадур бувну бивкIссар 277 азара къашайшалансса койка. Мура чIумух жува сакин бувну бивкIссар му цIуцIаврищал талансса мукьцIалва центр.
Ца волонтер-душнил бувсунни пандемия дайдирхьусса чIумал жучIава мунил пишакартал бивкIшиву бувагу 8300, цIана тIурча, так хIакинтал бур му азардануха зузисса 150 азара, цинявппа медициналул зузалт – 520-530 азара. Ми давурттаву жува тамансса хьхьичIун бувккун буру. Жува дарурттугу хIадур буллай буру аьркинссаксса.
Аьрасатнал дунияллий цалчин буккан бувссар вакцина Гамалейл цIанийсса элмулул центрданий.

Гьай-гьай, жунма аьркинни санитар-эпидемиологиялул къуллугъ ххуй-хъин буллан, мунил реформа дуван. Уттигу цал ххал буван аьркинни, циксса аьркинну буссарив му азарданун хасъсса койкарду, цуми регионнай циксса пишакартал аьркинссарив. Мукунсса программа хIадур дурну дуссар, утти му бартдигьланну.
Инсантурал ахIвал кIюла буклай бур, давурттацIа хьусса гьарза хъанай бур. Багьри лавай най бур. Дуссарив жулла гъансса чIумул мутталий ми захIматшивуртту бигьа дансса программа тIисса суал буллунни «Комсомольская правда» кказитрал вакилнал.

В. Путин: Гьай-гьай, мукун­сса программа дуссар. Пандемиялул тамансса къаххуйсса асарду биян бунни жулла производстварттан, лакьин багьунни цаппара заводру, даву дакъа ливчIунни инсантал, чан хьунни агьалинал доход­ру. План укунсса дур: 2030 шинал прожиточный минимумраяр чан­сса доходру думи хIакьинусса 13,5 %-бучIан буван 6,5 %.
Утти багьрал хIакъираву. Махъ­сса 6 шинай жура ласарду рекордрайнусса бакIлахъия къалмул. Гьашинугу му хьунтIий дур 131 млн тонна, бюхъайссар ххишалагу. Амма ччатI ххира хъанай бур, макароннал багьа лахъ хъанай бур. Му цукун хьун бюхъай­сса затри? Циванни? Качарданул хIакъираву. Ттухь бия тростникрал качар ласлан аьркинни тIий. Жува мукунгу барду, амма ми­ккугу виваллил рынокрай дур диялдакъашиву. Министрнал ттун баян бувна виваллил рынокран гьасса бушиву. Цукунни, туну, качар ххира хьун бюхъайсса.

Ягу пархтIутIул нагь – 17% ххира хьуну дур. ЖучIара пархтIутIи дакъассарив? Гьассаксса диял­сса дуссар. Циванни му ххира хьу­сса? Цанчирча дунияллул рынокрай ххира хьуну тIий. Мукун зун къабучIиссар.
Мунияту жул дянив кьянкьа­сса гъалгъа хьуссар. ХIукуматран бувчIуссар хъанахъимур.
Президентнал жавабирттавасса цаппара агьамсса, къюву­сса кIанттурду язи бувгьуну, жу аьлтту банну хъиривсса номерданийгу.