«Дагестан» РИА-лий хьунни республикалийсса коронавирусрал инфекциялул тагьарданун хас дурсса ДР-лул Рос­потребнадзорданул каялувчинал хъиривчу Лариса Пантинал ва цIуллу-сагъшиву дуруччаврил министрнал буржру биттур буллалисса Татьяна Беляевал брифинг.

---

Микку ихтилат бия республикалий коронавирусрал къашавайсса инсантал чIяву хъанай бушиврия.
Лариса Пантинал кIицI лавгунни вай гьантрай Роспотребнадзорданий хьусса коронавирусрал инфекция ппив хьун къаритаврил ялув зузисса Оператив штабрал батIаврий управлениялул каялувчи Николай Павловлул Республикалул БакIчи Сергей Меликовлун баян бувшиву санитар-эпидемиологиялул тагьар ххуй дан­сса чаранная.
«ХIакьинусса кьини республикалий лахъ хъанай дур ссуттил чIумалсса вирусрал инфекцияртту ва миннущал архIал анавар дуклай дур коронавирусрал цIуцIаву ппив хъанахъавугу. Му сававрай коронавирусрал цIуцIаву ппив шаврия буруччиншиврул багьлай бур ахIрамирттаву ва мизитирттаву эбадатру дан, ЗАГС-рал идаралийн магьар бишаврил шадлугърайн ацIа инсаннаяр ххишаласса къаитлан.

Транспортраву ва агьалинал хIаллихшиннардаха зузисса идарарттай, дахху-ласу дуллалисса кIанттурдай маскарду лаххаврил ялув бацIаву кьянкьа дан, Роспотребнадзорданул тIалавшиннардайн мютIи къахъанахъиминнай аькIри дихьлан. Ккаккан бунни идарар­ттал каялувчитал буржлув бан цала зузалтгу, хIаллихшиннардал ялув букIлакIимигу маскардал ва антисептикирттал дузал бан. Идарар­ттай гьарца кьини дезинфекциялул давуртту дуллансса чIун ккаккан дан», — увкунни Лариса Пантинал.
Ванил мукунма кIицI лавгунни тагьар ххуй хьуннин банкетный заллу лакьин, цанчирча, хъирив лаявурттайн бувну, махъсса зурдардий коронавирусрал къашавай хьуминнал хъунмур процент бусса бур чIявусса агьлу бавтIсса мероприятиярттая махъ къашавай хьусса. Къадагъа дирхьуну дур ЦIусса шинал елкалул ва корпоратив мероприятиярттай.
65 шинал оьрмулува бувксса инсантурахь шаппа бацIияра тIисса Республикалул БакIчинал Указрал хIакъираву Лариса Пантинал бувсунни шаппа щябикIансса чIун лахъи дуршиву декабрь зурул 4-нния 17-ннин.

КIицI лавгунни районнал ва шяраваллал бакIчитурал, участковыйтурал, волотерталгу кIункIу бувну, кьянкьа дан багьлай бушиву 65 шинал оьрмулува бувксса инсантуран ккаккан дурсса къадагъалул низамрал ялув бацIаву.

Дуккаврил идарартту цIунилгу дистанцион журалийн кIура баен бюхъайссарив тIисса суалданухьхьун жаваб дуллай, Лариса Пантинал кIицI лавгунни, оьрчIал ва жагьилтурал дянив коронавирусрал инфекциялул къашай хьуминнал аьдад чIирисса духьувкун, дуккаврил идарартту дистанцион журалийн бичинсса аьркиншиву да­къашиву. Бувсунни дуккаврил шин дайдирхьуния шинмай ми идарарттай кьянкьану биттур дуллай бушиву Роспотребнадзорданул тIалавшиннарду, ххал дуллай бушиву оьрчIал ва студентътурал температура, хIал чансса оьрчIру мугьлат бакъа шаппа щябитлай бушиву.

Татьяна Беляевал бувсунни ЦIуллу-сагъшиву дуруччаврил министерствалийн гьарца кьини дучIайшиву ковид цIуцIаврийн ва пневмониялийн щак буну уттубишин бувсса къашайшалтрал сияхI.
«Цаппарасса нюжмардай ковидрайн щак буну уттубишин був­сса къашайшалтрал аьдадрай буссия кIиттуршуннийн бивсса инсантал, ноябрь зурул 25-нний му ­аьдад лархъунни 264-ннийн, ноябрь зурул 29-нний – 307 инсан.

ХIакьинусса кьини республикалий тIитIин бувну бур ковидрал къашавайминнансса 2681 тах, миннува 731 бур махъун бивтун.
Татьяна Беляевал бувсунни къашайшиву куклуми хъин хъанай бушиву шаппа-шаппа, дежурный хIакинтурал аякьалулу.
Мукун хъин хъанай усса ур хIакьинусса кьининийн 1119 инсан.

Ванил кIицI лавгунни Аьрасатнал ХIукуматрал федерал бюджетрава коронавирусрал цIуцIаву амбулаториялул шартIирдай хъин хъанахъиминнан даруртту ласун Да­гъусттаннан итадаркьуну душиву 117 млн къуруширттал. Миннува 35 млн къуруширттал тIайла дурккун дур республикалул шагьрурдал ва районнал цIуллу-сагъшиву дуру­ччаврил идарарттайн.