Ссайну дакIний лирчIри вин ларгсса нюжмар?

МахIаммадхIажи Маккуев, Республикалул Педагог-вете­рантурал ва насихIатч­итурал советрал председатель:

– Ларгсса нюжмардий, цинявппагу агьали кунма, нагу ссавур дакъа ялугьлай ивкIра Аьрасатнал Президентнал пресс-конференция дайдишиннин. Билаятрай хIасул хьусса коронавирусрал инфекция ппив шаврицIун дархIусса тагьарданийн бувну, ва ххуллухсса конференция хьунни вайминнуха къалархьхьусса, манзилданул режимрайсса.

Президент гъалгъа тIий ия, журналистуращал акъассагу, укунмасса агьалинащалгу. Конференциялийсса ихтилатру бия виваллил политикалул ишир­ттая, экономикалул, социал багьу-бизулул, виваллил ва кьатIаллил масъаларттаясса. Гьаз бунни мукунма цIуллу-сагъшиву дуруччаврил системалул кьянкьасса тIалавшиннарду бартдигьаврил, оьрчIру бусса кулпатирттан выплатарду дулаврил, вакцинарду баврил, США-наву бувчIавурттал, оьруснал хакертурал, пенсиярттал индексациярттал, дуки-хIачIиялул багьри гьаз баврил, Рамзан Кьадировлуйн къаршисса санкциярттал, «Серный поток-2» , Беларусьнавусса протестирттал, Туркнал президентнал ва цаймигу агьамсса масъаларттал хIакъиравусса суаллу.

Экономика цIулаган даврил хIакъираву Президентнал бакIрайва бувсуна шинал лажиндарай чIалантIишиву ххуй чулиннайсса дахханашивуртту. Жуяра ларгсса шин ххуй дакъасса дия куну цIа рищунгу къабучIиссар. Даххана хъанахъисса гьавалул тагьар кунна, экономикалувугу хьуссар кIицI лагансса ххуйсса ва къаххуйсса чуллу. Мяйжаннугу, жуятура нанисса шин бигьа да­къасса хьунни. Тамансса производствардал, авиаперевозчиктурал, муххал ххуллурдал давурттайн щавщи бивунни, цикссагу инсантал давурттацIа хьунни. Пандемия сававну дурксса кьини тIурчан, Европанал хьхьичIунсса хIукуматирттаяр махъун къабагьну, лайкьну ла­хъан бювхъунни жущара.

Владимир Путиннул мукунма балжину бувсунни экономика хьхьичIуннай шаврил тагьар ци даражалий дуссарив. Коронавирусрая буруччаву мурадрайсса хIакинтурал чулухасса тIалавшиннарду биттур дулларча, «локдаун» баян баву дакъассар увкунни Президентнал. Лайкьсса кьимат бивщунни вай иширттаву хьхьичIунну зий бивкIсса медиктуран, волонтертуран.
– Жула билаят бакъассагу, щалагу дуниял ясир дунни коронавирусрал пандемиялул. Вай иширттавугу тасттикь хьунни жула медицина лайкьсса даражалийсса душиву. Жулла хIукуматгу дурххунни тестру сакин бувсса, дунияллул шама хьхьичIунсса лидер усса сияхIравун. Коронавирусрая буруччаву мурадрайсса вакцина Аьрасатнавур хьхьичIва-хьхьичI хIасул буллай байбивхьусса ва му сакин бувсса, – увкунни Владимир Путиннул.

Ялагу Президентнал кIицI лавгунни цIуллу-сагъшиву дуруччаврил аралуву, январь зурул 1-нния байбивхьуну, реформа дайдишинсса пикрилий бушиву. Федерал бюджетрава цIуллу-сагъшиву дуруччаврил сферардавусса дахханашиннарду даврин итабавкьуну бур 500 млрд. арцул ва регионнал бюджетрава – 50 млрд.
Балжину бувсунни Путиннул цIанакул цайми хIукуматирттай хъанахъисса къалмакъаллал ва цаймигу иширттал хIакъираву.
Президентнахь цIухху-бу­сурду буллалисса суаллавух бия санкциярдал, пенсиярттал хIакъиравусса чIявусса цаймигу суаллу. Путиннун цивппа хIисав хьуншиврул заллавусса инсантал бия «Ттул лякьлуву бур», «На ветеранна» тIисса ва цаймигу баннерду дургьусса инсантал.

Цинявннан асар хьусса, дуки-хIачIиялул багьри гьаз шаврил хIакъираву Президентнал кIицI лавгунни цаппара багьри гьаз шаврин хIакьсса багьантту бушиву. Гьашину рекордравун дурхсса 131 млн тонналия лирчусса бакIлахъия ларсун дунура, ччатIул, макIароннал, качарданул багьри гьаз хьушивугу – му аьжаив бизансса зат хъанахъишиву. Дунияллул рынокирттай багьри гьаз шайхту, жучIавами багьригу миннуйн биян буллалисса кIанттурду хьунни. Владимир Путиннул кIицI лавгунни Правительствалун, чIун-чIумуй дуки-хIачIиялул багьрал ялув бавцIуну, му масъала цалийн бутан аьркинну бивкIшиву. Бувсунни цIанакул кьутIирду дурну душиву производительтурал ва сетирдал дянив. Мукунма бувсунни Конституциялий цIакь бувну бушиву пенсиярттал индексацияртту баврил хIакъиравусса масъала.

БакIрая ччаннайн ияннин вичIилий ивкIра на жула БакIчинал жавабирттах, вихшалагу ххишала хьунни агьалинал багьу-бизу баххана хьуншиврийнсса.
ЦIусса шин дукIлакIисса ссятраву, Президентналгу кусса журалий, гьаз банну жувагу кIива кьуру – Аьрасатнахлу ва Да­гъусттаннахлу!|