Вай гьантрай Дагъусттаннал региондалийсса «Единая Россия» партиялул отделениялий агьали кьамул бунни Аьрасатнал ПаччахIлугърал Думалул депутат Аьбдулмажид МахIрамовлул. Коронавирусрал инфекция ппив шаврицIун дархIусса тагьар уттигу хьхьара хьун дурашиврийн бувну, ва ххуллухссагу агьалинащалсса хьунабакьаву хьунни манзилданул режимрайсса.
Ахъушиял райондалийсса Зилмух тIисса шяраваллил жяматрал цIания депутатначIан оьвтIий ия Асадуллагь Насруллаев ФАП-рал строительствалул масъала щаллу баврил хIакъираву. Насруллаевлул бусаврийн бувну, шяравусса ФАП бусса бур лицензиялул тIалавшиннарду биттур къадуллалисса, цукунчIавсса шартIру дакъасса къатраву бивхьуну.
Му бакъассагу, ФАП бивхьусса къатраву дакъасса дур щин, газ ва гъилишиву. Депутатнал ва масъалалул хIакъираву райондалул бакIчинайн чивчунни бюхъайссаксса кумаг баву тIалав буллалисса чагъар.
Лаващиял райондалийсса Сусакент шяравасса Аьбдуссалам ЯхIияхIажиев оьвтIий ия депутатначIан щинал масъала дузал бан кумаг баврил хIакъираву.
«Жул шяравусса чIявуми агьали бур нувщи, калан, къур дугьаврихун багьсса. Шяраву ахънилссаннуя бакIлахъия ласласисса хозяйстварду ялу-ялун гьарза хъанай дур, миннуйн рутIлансса щингу диял хъанай дакъар. ХIатта хIачIансса щин цайми районная ласун занан багьлай бур», – тIий буслай ур Аьбдуссалам.
МахIрамовлул ва масъалалул хIакъираву бувсунни аьрза чичиншиву Дагъусттаннал Шяраваллил хозяйствалул министерствалул программалул пландалувун щинаххуллу баврил строительствагу рутаву тIалав буллалисса.
Льгота дусса пенсия бишин кумаг баврил хIакъираву оьвтIий бия Забидат Рабаданова. Ванил бувсунни 2005 шиная шинмай цуппа зий бивкIшиву Каспийскалийсса ххассал бувултрал ва ххал бигьултрал базалий ва мунийн бувну багьайсса льгота дусса пенсия бишлай бакъашиву. Депутатнал ва масъалалул хъирив лаяву тIалав дуллалисса хасъсса аьрза чивчунни Дагъусттаннал региондалийсса АьФ-лул Пенсионный фондрайн.
Хъирив депутатнайн оьвкунни Буйнакскаллал райондалул бакIчи Камил Изиевлул оьрчIал багъру баврил масъала щаллу баврил хIакъираву. Камил Изиевлул кIицI лавгунни цIанасса чIумал Буйнакскаллал райондалий 2259 оьрчI кьамул увсса 16 детсад бушиву. Райондалийсса агьали ялапар хъанахъисса 17-хъул шяраваллаву цавагу оьрчIал багъ бакъашиву. Ванал бувсунни хIакьинусса кьини оьрчIал багъравун кьамул бансса сияхIрай 4994 оьрчI ушиву.
МахIрамовлул ва агьамсса масъалалул хIакъираву хасъсса чагъар чивчунни региондалул ХIукуматрайн.
Вай бакъасса, цаймигу масъалартту ххал бивгьунни ва ми щаллу баврил ялув ацIаву цала бакIрайн лавсунни Аьбдулмажид МахIрамовлул.
