ЦIусса хаварду ца-кIива ххуттайну

ЦIусса хаварду ца-кIива ххуттайну

Иорданиянаву карантин баян бунни
Иорданиянал властирдал коронавирусрацIун бавхIуну, карантин баян бунни, бувсунни, сентябрь барз къуртал хьуннин школартту лакьлакьишиву, лавайми классирттаву дуклакими дистанцион журалийн бутлатишиву. КIира нюжмардийсса лавкьунни мизитру ва килисарду, базарду, ресторанну ва банкетрал заллу. Коронавирус дирсса агьлу яхъанахъисса къатравунгу цучIав уххан-уккан къаитлай, къарал бацIан бувну бусса бур. Тайннал премьер-министр Оьмар Раззаз ур, укун кьянкьасса чаранну къаккакларча, вирусран ххуллу кьукьин къахьунтIиссар тIий.

Хиджабравусса душ волейболданий буккан къабивтун бур
Американаву волейболданий буккай турнирданийн къабивтуну бур хиджабравусса дуклаки душ. Судья Реферил бувсмунийн бувну, чIава спортсменка Наджу Акил спортрал лаххиялуву буккан кIанттай бяст- ччаллил майданнив був­ккун бур «цайми лаххиялуву».

ТIивтIунни дачIи шинай лавкьуну бивкIсса
Тадж- Махал
Вай гьантрай зун бивкIунни Индиянал Тадж-Махал мавзолей.Та лавкьуну дачIи шинъя. Коронавирусрал пандемия сававнуя лавкьуссагу. Мяйжанссар, хьхьичIва мавзолейравун гьантлий 70 азара инсан уххайсса ивкIхьурча, утти ххюазаруннияр ххишаласса къабучIину бур.

Аьрабусттаннай хъатIай, бивкIурдай 10 инсаннан цачIун батIин бучIину бур
Аьрабусттаннал властирдал тIалавшиннардайн бувну цал архIал хъатIайн, бивкIурдайн цачIун батIин бучIину бур 10 инсаннан. Низам дуруччаврил ялув бавцIуну бусса бур тайннал генпрокуратура.

Вирус дирсса 104 шинавусса къари хъин хьуну дур
Туркнал СМИ-лул баян бунни азарханалия коронавирусрал азарданухьхьун дирир­сса 104 шинавусса къари хъин хьуну, итадаркьушиву. АцIния урчIва гьантта бувну бур Бейаз Къаплан тIисса къарил хIукуматрал азарханалий хъин хъанай. Ва коронавирусраща ххассал хьусса яла оьрмулул хъунмур инсан бакъар, ванияр бугьарасса, 107 шинавусса, Хавахан Къарадениз апрельданий азарханалия итабавкьуну бур, хъин хьуну.

ХIадур бувссар
П. Рамазановал

Читайте также: