Оьруснал театрду цIунилгу Дагъусттаннай

Дагъусттаннай дайдирхьунни Ухссавнил Ккавкказнал республикарттал, Каспи хьхьирил ва ЛухIи хьхьирил региондалул, гъанмур ва архмур дазул кьат1атусса билаятирттал оьрус театрдал дунияллул халкьуннал дянивсса ряххийлчинмур фестиваль.

Зулайхат Тахакьаева
ХьхьичIва бувсъсса куццуй, пандемия сававну, ва базилух фестиваль дуллалиссар «онлайн» кьаралданий. Лахъи лаган тIий дур фестиваль ва зурул 14-ннийн. Фестивальданий бивхьусса спектакллу ххал бан бюхъантIий бур театрданул Youtube-каналданий.
Ва хъуннасса лагрулул проектрал сакиншинначитал бур Да­гъусттан Республикалул Культуралул министерство, М. Горькийл цIанийсса Оьруснал драматический театр ва Дагъусттаннал Театрал ишккаккултрал союз.

Проектрал сиптачи ур Оьруснал театрданул хъунама режи­ссер, Аьрасатнал магьирлугърал лайкь хьусса ишккакку Скандарбек Тулпаров.
Фестиваль сакин дурния шинмай муний гьуртту хъанахъиминнал Оьруснал театрданул сахIналий ккаккан бунни дунияллул классикалул ва ттизаманнул драматургиялул премьерартту.
Эпидемиологиялул тагьар сававсса ссуссукьушиннардах къабурувгун, фестивальданул программа дур авадансса ва хIаз дизансса!
Фестиваль тIитIлатIисса шадлугърай театрал байрандалул гьурттучитурахь яхши-хаш буллалисса цила ихтилатраву ДР-лул культуралул министр Зарема Буттаевал кIицI лавгунни оьруснал театрал школа бивкIшиву ва ттигу личIлай бушиву дунияллул лагрулий хьхьичIунсса ишну.

— Фестивальданул сакиншинначитурал мурадну хъанахъи­ссар му школалул аьдатру ядаву, Аьрасатнал рувхIанийсса ва магьирлугърал ххазна хьхьичIунмай баву, бюхттулсса оьруснал махъ магьирлугърал ахIрамрал ссавнилу пахрулий балланшиврул. Магьирлугърал ахIрамну тIурча, хъанахъиссар театр. Фестиваль чIявусса миллатру ва чIявусса театрду бусса Дагъусттаннал аьрщарай дуллалаву хъанахъиссар оьруснал культура ва оьрус махъ цачIун буллалисса дайдихьулул кьиматну,-увкунни министрнал.

Билаятрал театрал магьирлугърал хьхьичIунсса ишккаккултрая (Валерий Подгородинский, Александр Мягченков, Елена Покорская, дагъусттаннал театровед Гулизар Султанова ва жула республикалийн гьашину цалчин увкIсса Ювеналий Калантаров) сакин хьусса жюрилущалгу кIул бувну , Зарема Буттаевал ххи бувна:
— ДакI дарцIуну бура Ухссавнил Ккавкказнал республикарттал, Каспи хьхьирил ва ЛухIи хьхьирил региондалул, гъанмур ва архмур дазул кьат1атусса билаятирттал оьрус театрдал дунияллул халкьуннал дянивсса фестивальданул кабакьу бантIишиврийн халкьуннал дянивсса дусшиву, кувннан кув бувчIаву, цашиву цIакь даврин.
Жюрилул хъунама Валерий Подгородинскийл маслихIат бунни сакин дан республикарттай зузисса Оьрус театрдал ассоциация.
«Ттун ххай бур дуркIун душиву чIун мукунсса, ассоциация сакин дурну, Бурятияная ва Якутияная тIайла хьуну, дянивсса ва Ух­ссавнил Ккавкказнал республикарттал оьруснал театрду цачIун бан бюхъансса».

Фестиваль тIиртIунни «Театр Луны» тIисса Москавуллал театрданул «Королева» тIисса спектакльданийну. Ва бур А. Дюмал «Нельская башня» тIисса пьеса гьануну лавсъсса дянивмур ттуршукулул боевик. Режиссер-постановщик – Дарья Попова.
Гьашину фестивальданий гьуртту хъанай бур оьруснал театрдал ацIния ххюва коллектив: Германнавасса, Азирбижанная­сса, Сербиянавасса ва Украиннаясса. Аьрасатнал регионная фестивальданий цала спектакллу ккаккан бан тIий бур Къазанная­сса, Черкесскалиясса, Назраннаясса, Нальчикраясса, Грозныйраясса, Элисталиясса ва Астраханнаясса театрдал.
Фестивальданул лагрулий бикIан тIий бур режиссертурансса ва актертурансса мастер-классру.