Шяраваллавусса школарттайн 104 учитель тIайла увкссар

Вай гьантрай республикалул ХIукуматрал совещаниялий ххал бивгьунни «Земский учитель» тIисса программа бартдигьаврил бущи. Ва совещаниялий каялувшиву дунни кIулшиву дулаврил ва элмулул министр Уммупазил Оьмаровал.

П. Рамазанова
2019 шинал ва программалул дайдихьу дуван шяраваллавусса школарттайн гьан бувну бивкIун бур 50 учитель. Миннан ца-ца миллион буллуну бур республикалул бюджетрава. Гьашину проект федерал лагрулийн гьаз хьуну духьувкун, ккаккан був­сса субсидия буллалиссар федерал бюджетрава. ТIалавшиннагу укун­ссар: программалувух гьуртту хъанахъими шяраваллил школалий зун аьркинссар ххюра шинай. Гьашину сентябрь зуруй ва программалийн бувну школарттай зун бивкIссар 104 учитель, миннавату 35 — ингилис маз лахьхьин буллай, 16 — математика дихьлай, 10 — тарихрал дарсру, 6 — химия, 5 — физика, 2 — физкультура. Вай учительтал язи бувгьу­ссар буллусса документирттайну, школарттал директортуращалгу маслихIат ккавккун.

Уммупазил Оьмаровал шяраваллил кIанттурдайсса хъуниминнахьгу миннат бунни, районнайн, шяраваллавун зун бувкIсса учительтурал чIарав бацIияра куну. Ванил бувсмунийн бувну ва программалул биялсса кабакьу буллалиссар шяраваллил кIанттурдай биял къахъанахъисса учительтал дузал буван.