Чув-унугу чан акъасса лаккучу

Гьарца гъинттул жул редакциялий чан къашайссия Аьрасатнал цайми шагьрурдая бувкIсса хъамал, гъурбатрай миналулгу хьуну, тих-ших зий-заназисса жула лак. Гьашину­сса гъирив, бувчIлачIисса куццуй, дюкъархъусса, хъамаллурал чулуха мискинсса хьунни.
Ва «гъалатI» бакьин бан куна, уттигъанну жул редакциялийн хъамалу увкIунни Псковуллал областьрайсса Новый-Изборск тIисса хъун бакъа­сса шагьрулий ялапар хъана­хъисса Гъумучатусса Ибрагьимов ХIажи-ХIусайн ХIасан-ХIусайннул арс.

Залму АьбдурахIманова
Ва жун кIулссия цаппара шиннардил хьхьичI телефондалувух Псковуллал областьрайсса Опочка тIисса, жула миллатрал тарихрацIун бавхIусса, шагьрулиясса ца хаварданул ялув хьусса ихтилатрайнугу. Тани ХIажи-ХIусайннул бувсъссия жухь цува хъамалу хьуну ивкIшиву Семен ва Гъумучатусса ганал кулпат Любовь (Рукьижат) ГейченкохъачIа. Гай бия тIар оьрму лавгсса, амма ккаккан ххуйсса ва цаннан ца бавкьусса лас ва щар. Дия тIар гайнначIа Опочкалийн ссивир бувну гьан бувну бивкIсса жула лакрал чиваркIуннал сияхIгу, гайнная бувсъсса канихчичрурдугу. ХIажи-ХIусайннул бусаврийну, Рукьижатлул цахьва бувсъсса затру чичин бакIравун къабувххун, цахьва цува яламур ххуллухсса аьрххилий чичинна тIисса пикрилий ивкIун ур, га цалчинсса ва махъра-махъсса хьунтIишивугу къакIулну. «Утти, туну, хIайп тIий ура»,- тIий буслай ур ва.

Увну ур ХIажи-ХIусайн Гъумук 1954 шинал. Ванал ппу ХIасан-ХIусайн, Хъун дяъвилул гьурттучи, шяраву цинявннан кIулну ивкIун ур ХIасан-мямма тIий. Зий ивкIун ур колхозрал председатель Нажму­ттин Щурпаевлул хъиривчуну. Кулпат ПатIиматгу, ХIажи-ХIусайннуцIун ялагу шама арсналсса буллай, къатта-къуш бачин бувну бивкIун бур. Арсру мюрщисса чIумала ХIасан-ХIусайн колхозрал иширттай арив гьан уллай, вайннал кулпат бивзун бур Гъумучиял къутандалийн. Гикку 5 классгу къуртал бувну, ХIажи-ХIусайннул 9 класс бувккуну бур Къизлардайсса школа-интернатрай. Барчаллагьрай дакIнийн бутлай ур ва цанма кIилчинмур нину кунма, ххира хьуну бивкIсса цала учительница Шепелева Анна Петровнагу. Гъумучиял школалий 10 классгу къуртал бувну, ХIажи-ХIусайн дуклан увххун ур МахIачкъалаливсса, тани «Холодильник» учайсса бивкIсса, техникумравун. КIива курс къуртал бувсса чIумал, кулпатрал ишру хьхьичIун багьну, ванан дуккаву кьаритан багьну бур. Ми диркIун дур нину яла ларгсса, ванал оьрмулуву ца хъинну захIматсса чIунну. Къатлуву хъамитайпагу бакъа, цала хъирив кIия мюрщисса уссурвалгу бухьувкун, ванан багьай­сса бивкIун бур чIявусса кушурду буллан. Буттагу, циркулярдануха зий ивкIссар тIий, каний­сса хьхьару кьувкьуну, ца канил сюкъасса ивкIун ур.

ХIажи-ХIусайннуйн тапшур бувну бур Псковуллал областьрай яла хъуннамунин ккаллину диркIсса ххюл буккай карьерданул хъунаманал къуллугъ. 10 шин дурну дур ванал гикку зий. Зийгу ивкIун ур зузалтран бусрав хьунну ва цала мукъул хIурмат буну.

 

Цаппара шиннардива Германнаву аьрали буржгу лавхъун, ХIажи-ХIусайн къутандалийн зана хьусса чIун диркIун дур. Ца ххуллух гиккун цала даврил иширттай увкIун ур аьрщив лахъиннай, уттаннай дуцлацисса ва чичлачисса пишакар. Кумагран ганацIун авхIуну ур ХIажи-ХIусайнгу. Ганал бувсун бур жагьилнахь, Дагъусттаннай «Севкавгипрозем» тIисса институтрал филиал тIитIлай буну, гиккун республикалул районнай зунсса жагьилсса пишакартурах луглай бушиву. Гъумук зузисса землемер оьрмулул угьарасса зузала уну, ХIажи-ХIусайн учIаврищал институтрал директорнал гацIана кьамул увну ур. Кьамул аврицIун цува кунма­сса 5 жагьилтуращал дачIи шинайсса дуклан гьангу увну ур Куйбышеврайн (цIанасса Самара) техникумравун, землемер-топографнал пишакар хьун.

ХIажи-ХIусайннул
бусаврийну, лакку мазрах ва Ватандалийсса иширттах мякь увксса ванал гьарца тталлаткьини цала кулпатращал архIал ккаккайсса дур «Аьрщи ва агьлу» тIисса передачагу. Редакциялийн учIаврил мурадгу ванал цаятува бусансса бакъаяча, хъунмурчIин цува яхъа­нахъисса кIанайн миллатрал кказит чичин увкIсса бия.

ХIажи-ХIусайн цувагу чур­ххал кьянкьасса, тивталсса ва дирисса жагьил ивкIун ур. Гьуртту шайсса ивкIун ур техникумраву спортрал личIи-личIисса бяст-ччаллавухгу, футболданул турнирдайгу. Тиккува кIул хьуну ур цала оьрмулул дус хьун нясивну бивкIсса оьрус миллатраясса душ Надеждащал. Та бивкIун бур Псковуллал областьрая техникумравун дуклан гьан був­сса студентка. Дуккаву къуртал хьувкун, Дагъусттаннайн занагу хьуну, мачча-гъаннащал буцай душгу кIул бувну, магьаргу бивхьуну, ХIажи-ХIусайннул пикри бувну бур кулпатращал Псковуллал областьрайн гьан. Ти­кку ванайн оьвкуну бур Надежда зий бивкIсса строительствалул комбинатрайн. Директорнал тавакъю бувну бур цачIана даврийн уххан, ххюл буккайсса карьерданийн. ХIажи-ХIусайнгу рязи хьуну ур. Зий ивкIун ур кIира-шанна сменалий. Ми­ччасса ххюл ишла байсса бивкIун бур областьрайсса строительствалул чIявусса кIанттурдай. Ххуйну зузисса ХIажи-ХIусайн цаппара хIаллава ивтун ур мастерну. Шиная шинайн давугу лахьлай, цува зузисса кIанай бусрав-сийгу лахъ хъанай, ва яла ивтун ур участокрал хъунаману. Муния махъ ванайн тапшур бувну бур Псковуллал областьрай ца яла хъуннамунин ккаллину диркIсса ххюл буккай карьерданул хъунаманал къуллугъ. АцIра шин дурну дур ванал ги­кку зий. Лайкь хьуну ур чIярусса хIурматрал грамотарттан ва барчаллагьрал чагъардан. ЦIана ХIажи-ХIусайн ур ЗахIматрал ветеран.

Гьарца аьрщарал касакрал заллухъру хъанахъисса 90-ку шинну дуркIсса чIумал, зузалтран харжру булун къабюхълай, личIи-личIисса тIалавшиннарду бартдигьин къабюхълай тIий вайннал карьергу ларкьуну дур. Миккугу цалла даву ххуйну кIулсса, бусравсса пишакар даву дакъа къаливчIун ур. Хъиривмур кьинива ХIажи-ХIусайннул хъирив бувкIун бур «Аннинскино» тIисса Карьеруправлениялул директорну зун нану тIий. Га къуллугърайгу ванал ацIра шин дурну дур. ЧIярусса шиннардил мутталий цIуллу-сагъшиврун заралсса, захIматсса давурттай зий ивкIсса ХIажи-ХIусайн ччяни пенсиялийнгу увккун ур. Ва пенсиялий игьалаглай усса бавну, школалул директор увкIун ур ваначIан футболданул секциялул даву дачин дан ва мюрщи классир­ттал оьрчIахь физкультуралул дарсру дихьлан нану учин. Вагу рязи хьуну ур. Ца-кIира шинал хьхьичI, ХIажи-ХIусайннул даврил опытрая бавну, ванайн оьвкуну бур зун Китайнал дазуя 50 км архсса Краснокаменск тIисса «лавкьусса» шагьрулий уран буклакисса карьерданий. Ва ду­сса дур «Роснано» тIисса жунна чIявучин бавсса компаниялул карьер. Ххуйсса харжгу, укра­сса хIаллихшиннарду диркIнугу, цIуллу-сагъшиврулмур масъала ялун буклан бивкIукун, ХIажи-ХIусайн ялагу зана хьуну ур цува зий ивкIсса школалийн.
Цала кулпатращал архIал ванал оьрмулул ххуллийн бивчуну бур цалла ниттил цIа дирзсса душ ПатIимат ва арсру Арсен ва Рустам. ПатIимат цила оьрчIащал ва ласнащал яхъанай бусса бур нину-ппу бусса шагьрулий. Ванил кIиягу арс Псковуллал футболданул цачIундур командалул гьурттучиталну бу­сса бур. Арсен кулпатращал ва шама арснащал яхъанай усса ур Таллиннай ва зий усса ур Финляндиянал хъуншагьру Хельсинкилий. Ванал Тимур тIима арсная гьашину хьуну ур Эстоннал лачIунбуккултрал турнирданул чемпион.
Рустам тIима арсгу зий усса ур Хельсинкилий, цIана дазурду ларкьуну дуну, кулпатращал ва кIива душнищал Псковскалий яхъанай усса ур.
ХIажи-ХIусайннул бусаврийну, лакку мазрах ва Ватандалийсса иширттах мякь увксса ванал гьарца тталлаткьини цала кулпатращал архIал ккаккайсса дур «Аьрщи ва агьлу» тIисса передачагу. Редакциялийн учIаврил мурадгу ванал цаятува бусансса бакъаяча, хъунмурчIин цува яхъанахъисса кIанайн миллатрал кказит чичин увкIсса бия.
Жугу жула хъамаличунан цIуллушиврцIун чIа учин ччай буру оьрчIая ва минная бивзсса наслулиясса ххаришивуртту. Ватандалийнсса аьрххи-ххуллугу дакI ххарисса бакъа къахьуннав ванан!