[dropcap]А[/dropcap]ьрасатнаву коронавирусрал пандемия сукку хьусса чIумал хъуннасса хъар лархъсса хIакинтурал, волонтертурал цIу-цIусса цIарду утти-уттигу ялун личлай дур. Вайннал бусласимуних вичIидирхьувкун,

медициналул зузалал кьадру-кьимат хъиннува гьаз хъанай бур. Учин ччива, чIявусса хIакинтурал-дагъусттанлувтурал, республикалий бакъассагу, Аьрасатнал лич1и-лич1исса шагьрурдал азарханардай ва поликлиникардайгу зий ккаккан бунни цала пишалул даража ва граждан позиция.
ЦIанасса ттул ихтилат жагьилсса хIакин, Бархъаллал шярава­сса Макьсудлул ва Рукьиятлул душ ПатIимат ХIасановаятур.

---

[dropcap]Ш[/dropcap]иккува бусан, ПатIимат шяраваллил жяматран бусравсса, чIярусса шиннардий Бархъаллал школалул директорну ивкIсса Чарак МахIмудовлул душнил душри, мукуна бусравсса, Лакрал райондалий чIявучин кIулсса, Гъумук заготконторалул хъунаману ивкIсса
Бархъаллал Мусал арснал душри. Буллалисса ихтилатрайнува чIалай бия ххуйсса тарбия ларсъсса ва пишалул кIулшивуртту ду­сса душ бушиву.

ХIакин хьунсса хиял ПатIимат­лул оьрчIнийва бивкIун бур.
— Ттун ххуй дизайва хIакин­ту­рал кIяла хялатру, гайннал къа­шайшалтрахсса аякьа, нахIу-хIалимсса ихтилат.
На чIивисса чIумал Гъумук бия сахIибулхайр дусса оьрчIал хIакин. Нава къашавай хьутари, ганил аякьа тIааьнну дикIайва ттун. Цамур пиша ттун цукунчIав кьамулну бакъая,-тIий буслай бур ПатIимат.

Укунсса душния ххаллилсса хIакин хьуншиврий щак багьлайгу бакъар.
Арулла шин дур ПатIиматлул Нижний Новгородрай ялапар хъанай. Ряхва класс буккиннин ва Гъумук бивкIун бур. Яла вайннал кулпат бивзун бур Владимирская областьрайн.
Муром шагьрулий школагу къуртал бувну ПатIимат бувххун бур Нижегородуллал медициналул академиялул (цIана ванийн Приволжский исследовательский медицинский университет учай – А.А.) педиатриялул факультетрайн.

2019-ку шинал мугу къуртал бувну, бувххун бур инфекциялул азардал пишакар хьунсса ординатуралувун. Ряххилчинмур курсрай дуклай бунува зун бивкIун бур оьрчIал поликлиникалий педиатрну. ЦIанагу ва дугу дуклай, зугу зий бур. Щалвагу билаятрай коронавирусрал инфекциялул пандемия дайдирхьусса чIумал вайннайнгу хъунмасса гуж багьну бур.

ПатIиматлул лахъай азардал пиша лахьлахьисса хасъсса центр Нижегородуллал областьрай инфекциялул азар ах­ттар дуллалисса яла хъунмамур идара хъанай бур. Шикку бур коронавирус кIул дан анализру дай­сса яла хъунмамур лабораториягу. ПатIиматлул ординатурагу ва центрданий ва оьрчIал клиникалий най дур. Участокрал педиатр хIисаврай ПатIиматлун багьну бур чIявусса къашайшалтрачIан шаппа-шаппай занан. ОьрчIру бусса къушливун бувкIукун, ванин кулпатравусса хъуниминналссагу, мюрщиминналссагу буллан багьлай бивкIун бур.
Хьунабавкьуну бур личIи-личIисса захIматссагу, бигьассагу иширттащал.

[pullquote]Ссигъасса вирус дия.
Ца кулпатраву архIал, хIала-гьурттуну бунува цавай къашай шайва, хIатта захIматнугума, гайминнал чIарах ду­ккайва.[/pullquote]

— Хъунмасса ццах багьну бия бугьараминнавун. Ми, гьарцимурца цIухлай, на итакъабакьлан бикIайва. Жу ци зун аьркинссарив, цукун мюхчан хьун аьркин­ссарив бувчIин буллай бивкIру.
Коронавирус сукку хьусса чIумал, март зурул ахирданийва тагьаргу бувсун, жухь хIадурну бикIияра увкуна. Дурна жущал цаппара тренингру.
Ссигъасса вирус дия. Ца кулпатраву архIал, хIала-гьурттуну бунува цавай къашай шайва, хIатта захIматнугума, гайминнал чIарах дуккайва. Ттула участок­райсса ца кулпатраву мюрщисса душваврава – кIинничалтрава ца къашавай хьуна. Гания азар лархъуна буттайн, хъирив, захIматну къашавай хьуну, азарханалийн дурцуна нину. Цинявннащал ца къушливу бивкIун бунува кIинничалтравасса цаннийн азар къалархъуна. Ттул элмийсса каялувчигу бия, цила практикалуву укун ссигъасса вирус цалчинни хьунадакьлакьисса тIий, — буслай бур ПатIимат. Ванил бусласимунийн бувну, Нижний Новгородрай тагьар, жучIара Дагъусттаннай кунна, оьнивун къадагьну дур, агьали ккаккан дурсса низамрайн мютIисса, тIутIимуних вичIи дирхьусса буну.
— Цалчинсса гьантрайва агьали цинярда тIалавшиннарду би­ттур дуллай бия. Шагьрулия арх бакъа, мартрайва буллай байбивхьусса госпиталь, апрель зурул кIира нюжмардул дянив бувну бацIан бувна.
Анаварсса бущилий госпиталь буллан бикIайхту, ццахгума багьуна, лажинни, Италиянаву, Испаннаву куннасса тагьар дикIантIиссарив жучIарагу тIий. МуницIун, цинявппа ин­фекциялуцIун бавхIусса азарханардугу оборудованиялулгу дузал бувну, резерврай бивтуна. Нава дуклай бивкIсса университет­рал госпиталь, шлюзру дирхьуну, боксру бувну, баххана бувсса куц ккавккукун, ттул дакI зия хьуна.
Цайми патологиярдугу духьунссия, къакIулли, та ппурттуву жул университетрал преподавательтуравугу ливтIусса хьунни. Хъинну къащи хьунни жагьил­сса, сагъ-саламатсса жул фтизиатриялул кафедралул заведующий, ххаллилсса преподаватель аьпалухьхьун лагаву. Ва жул яла хьхьичIунмур кафедрая,- буслай бур ПатIимат.
ЦIана ПатIимат цаппара гьантрайсса цила мина­лийн, Дагъус­ттаннайн, биян бувкIун бур.
— ЦIана тагьар къулай хьурчагу, паракьатну щябикIан ччя­ссар, -тIий бур ПатIимат. Ва оьвчаву дуллай бур агьалинайн, лавмартсса азарунния мюхчан хьун, баян бувсса тIалавшиннарду щаллу дуллан, марцIшиврул ялув бацIан, чIявусса инсантал бавтIсса кIанттурдайн къабуккаван. Жугу барчаллагь тIий буру ПатIиматлухь ва агьалинал цIуллу-сагъшиврул къаралданий бавцIусса цинявппагу медициналул зузалтрахь. Зун утти тачIав укунсса шартIирдай зунсса къабукканнав.