[dropcap]А[/dropcap]вгустрал 7-нний дайдирхьуну 15-ннин Дагъусттаннай хьунтIиссар фольклорданул ва аслийсса культуралул дунияллул халкьуннал дянивсса «Горцы» фестиваль. Ва хъанахъиссар «Культура» тIисса Национал проектрал лагрулий.

Бадрижамал Аьлиева
2004-ку шиная шиннай дуллалисса, ЮНЕСКО-лул дунияллул халкьуннал дянивсса фольклорданул проектирдал Календарьданийн ларсъсса ва 2012-ку шиная шиннай ЮНЕСКО-лул эгидалулу хъанахъисса фестиваль тарихраву хьхьичIра-хьхьичI хьунтIиссар тамашачитал ба­къанува. Мунинсса багьанагу – билаятрай ва республикалий хIасул хьусса эпидемиологиялул къулай дакъасса тагьар. Мукуннугу, ттизаманнул интернет технологиярттал каширдайн бувну, фестиваль ккаккан бюхъантIиссар халкьуннал творчество ххира­сса, мунил кьадру бусса гьарцагу инсаннаща: «Дагъусттан» ГТРК-лий ва РГВК-лий, мукунна Ютубрай Республикалул Халкьуннал творчествалул къатлул каналданий ва соцсетирдай.
«Горцы» фестиваль ччяния­цIара ккаллину дур Дагъусттаннал социокультуралул брендран, цилгу личIи-личIисса миллатру цачIун буллалисса, личIи-личIисса халкьуннал лавгмур, цIанамур ва бучIантIимур цачIун буллалисса, ябуллали­сса. Фестивальданул географиягу шиная шинайн гьарта-гьарза хьуну най бур. Фестиваль дуллалиссаксса хIаллай мунивух гьуртту хьуну бур Европанал, Кьиблалул Американал, Азиянал, Гъанмур Машрикьуллал билаятирттаясса сайки 40 коллектив, Аьрасатнал 80 региондалиясса творчествалул группарду.
Фестиваль сакин дуллали­ссар «АртМаксимум» ООО-лул ва Республикалул Халкьуннал творчествалул къатлул, АьФ-лул Культуралул министерствалул, В.Д. Поленовлул цIанийсса ГРДНТ-лул, ДР-лул Культуралул министерствалул ва Дагъусттан Республикалул БакIчинал кабакьаврийну.

Фестивальданул агьамми мурадру – халкьуннал аслийсса культура машгьур даву, дунияллул халкьуннал дянивсса культуралул дахIавуртту цIакь даву.
Гьашинумур фестивальданий гьуртту хьунтIиссар Ингушнал, Къарачай-Чаргаснал, Марий Эл, Ухссавнил АьсатIиннал-Аланиянал, Чачаннал республикарттаясса, Ставрополлал, Аьшттарханнал, Владимирдал, Пензеллал, Псковуллал, Ростовуллал, Саратовуллал, Тульскаллал, Ярославуллал областирдаясса творчествалул коллективру. Дагъусттан Республикалул культура, багьу-бизу ккаккан буллантIиссар фольклорданул 30 коллективрал ва таксса гьурттучитурал. Манзилданий цалла-цалла культура ккаккан дувантIиссар Азирбижаннава­сса, Индиянавасса, Ираннава­сса, Италиянавасса, Мексиканавасса, Сербиянавасса, Словакиянавасса творчествалул коллективирдал.