Аьраяллил ва оьрмулул ххуллу

Саэд Ибрагьимов

[dropcap]И[/dropcap]брагьиннул арс Ибрагьимов Саэд увну ур 1920-кусса шинал Лаккуй, ТIюхчардал шяраву. Ванан 12 шин хьусса чIумал вайннал кулпат бивзун бур Закаталлайн.

Тикку педтехникумгу бувккуну, Кировобадуллал педагогикалул институтраву заочнайну ккагу-ккалай, зий ивкIун ур учительну.


1940-ку шинал увцуну ур армиялийн.Тичча тIайла увккун ур Горький шагьрулийсса Зенитний артиллериялул училищалувун курсантну дуклан. Хъунмасса Буттал кIанттул цIанийсса дяъви байбишайхту, увцуну ур къуллугъ буллан взводрал командирну Москавуллал аьраяллил округрайн. Муния махъ, дяъви къуртал хьунцIа, Саэд талай ивкIун ур личIи-личIисса фронтирттай, аьраяллил ххуллу байгу ливтIуну бур Берлиннай. Аьрай ккаккан дурсса къучагъшивур­ттахлу лайкь хьуну ур 2 ордендалун ва 18 медальданун.

1945-кусса шинал декабрьданий, учитель хIисаврай, Саэд итаавкьуну ур шавай. Ялагу зун ивкIун ур цала пишалий – учительну. 1949-ку шинал тIурча, хIаписар хIисаврай, цIунилгу увцуну ур армиялийн, Халар тIисса Азирбижаннал шагьрулийн зенит-артиллериялул батареялул командирну.

1951-1955 шиннардий Саэд къуллугъ буллай ивкIун ур Австриянаву, зенитний дивизиялул управлениялул батареялул командирну. Ва гьуртту хьуну ур Венгриянавусса иширттавух. Муния махъгу къуллугъ буллай ивкIун ур Германнавусса полкрал штабрал начальникнал кумагчину.
Ахиргу, 1967-ку шинал, подполковникнал чиндалуву, Саэд Ибрагьимов увккун ур отставкалийн.

Муния мукьах зий ивкIун ур Бакуйннал «Охотобществалул»председательну. УвчIуну ивкIун ур Москавлив хьусса биологтурал конгрессрал делегатнугу. Мукуна кIийла увчIуну ивкIун ур авчитурал съездрал делегатнугу.
Укун авадансса, виричушиврул ва къучагъшиврул вибувцIусса оьрмулул ххуллу бивтсса инсан ур жула лакрал миллатрал лайкьсса вакил, Иб­рагьиннул арс Ибрагьимов Саэд . Аьпалухьхьун лавгун ур 1920-кусса шинал Бакуй, тиккува ув­ччунугу ур.

Цува Буттал кIанттуя яувцун ялапар хъанай ивкIун ухьурчагу, Саэдлул тачIаврагу кьукьин диртун дакъар цала ТIюхчардал жяматращалсса ва Дагъусттан билаятращалсса дахIавугу. Мунил ца ххисса барашиннану хъанай бур Саэдлул архивраву яхьуну ливчIсса, буттал аьрщарайсса кIанттурдал аьзизсса цIардугу гьарца ххуттаву кIицI лаглаги­сса ва шеъригу.

Аман, хьурдай учара

Хъун-муруллул ялувсса
КъувтIубичул лахъшиву,
ТIюхчаравппай бурувгсса
Аттал-БакIул ххуйшиву!

Эя-БакIу аьтIий бур,
АтIал-БакIухь аьрзирай,
Нажагь тIюхчар бучIарча,
Ттуйнгу баян бува тIий.

Лажинни, Эя-БакIуй,
ДакI къума мадулларда,
Июльданул ряххунний
ТIюхчар бучIан най бурча!

Къячлул-Щинал дяркъу щин,
Чизраваллил замзам щин,
Аман, хьурдай учара
Ца-кIийлва нахIала бан!

Марлалуй, Мазиялуй,
Леххаар, Кьали-Бизуй,
Ккузри буккай ЧIири-РатI,
ОьрчIал тIуркIу бай Кьаар!.

Ардараваллил лухччив,
БакIухаллил бизантту,
Мюрш тIутIалгу кIутIу тIий,
ХьхьичIун букканну тIий бур.

Инттухуннай хъя учай
Айдал-Гьаннай ччиккул-ус,
Хьурдай тIийна икIара,
Ца кацI бувну, ссунтI учин!

Хъабукул къатIрал хъанакI,
ЛякьлуцIаллил мамари,
Арнил-РатIнил кьюнукьи
Къабуккай ттул дакIния!

Хъуммал-Дарвач, Ницахъю,
Баллу-Ххая, Хъун-ХIалу –
ОьрчIи ттархьру дай чIунну
ТачIав хъамакъаритай!

ЯтIувахъай НякI-Кьуллай,
Гьаннилу Бюкьул-Кьуллай,
ЧIюйлий Палагил-Кьуппай,
Кьамул бара ттул салам!

07. 04. 1992 ш.
Ибрагьимов Саэд
ш.Баку