Республикалул «Итххявхсса оьрчIансса центр» тIисса лицей-интернатравун кьамул буллай байбивхьунни 2020-2021 ду­ккаврил шинал дуклансса оьрчIру.

З.АьбдурахIманова
Шикку дуклан гъира буми гьуртту хьун аьркинссар августрал 6-нния 8-ннин нантIисса цIухху-бусулувух (собеседование).
Центрданийн кьамул буллалиссар республикалул шагьрурдаясса ва щархъаясса 5-10-ми классирттал дуклаки оьрчIру. ОьрчIащал, гьарнащал цивппа-цивппалу, цIухху-бусу бантIиссар психологтурал ва учительтурал.

ЧIумуйну лицейрал каялувчину бивтсса Шагане Баймурзаевал бусаврийну, шанма гьантлул дянив язи бугьантIиссар шиву дук­лан лайкьсса, дуккавриву итххявхсса оьрчIру.
«Жу, учительтурал ва психологтурал, оьрчIащал ихтилатру бувну, центрданий дуклан кьамул бувсса оьрчIал сияхI хIадур дантIиссар. Лицейравусса программа оьрчIал дакI дакьин­сса, ххуйсса кIулшивуртту дулунну сакин дурну дуссар. Архсса районнал щархъавасса ва цайми шагьрурдаясса оьрчIан буссар хIадур бувну къулайшиннардугу дусса общежитие. Дуки-хIачIиягу оьрчIан дузсса, цIуллу-сагъшиврун мюнпатсса продуктирдаясса дикIантIиссар. Гьарзат шикку украссар. ОьрчIаясса тIалавшиннагу дарсирдах гъира буну, кIулшивуртту ласлан­сса хIарачат буллай бушивур дикIантIисса», -тIий бур Шагане Баймурзаева.