Дунияллийх цIа ларгсса ва альпинистътурал дянив машгьурсса зунттурду ясир бувсса ГьунчIукьатIрал шяраватусса ХIажимирзаев Зиябуттиннул цIа чIявуссаннан кIулхьунссар. Жула кказитрал редколлегиялул вакилгу ухьувкун,
жугу Зиябуттиннул язи дургьусса маршрутрал хъирив бацIару. Уттигъанну Зиябуттин цана цувалу лавхъунни Аьрасатнаву ва Европанаву ца яла лахъмур зунттун ккаллисса Эльбрусрайн. Зунттул бакIрайнгу лавхъун, цала дакIнийсса мурад щаллу хьушиву тасттикь бан, кIикку Зиябуттиннул бивщунни «Илчилул» логотип дусса ттугъгу. Цала бусаврийну, Эльбрусрайнсса аьрххи ванал бусса бур ххюлчинсса, амма ва ххуллухмур – цувалу гьаз хьусса.
Залму АьбдурахIманова
«Зунттул бакIрайн на ивра хIакьину кIюрххицIун. Лахьхьу ссят 12 хьусса чIумал на ивкIра 4100 метралул лахъшиврийн ивну. Так хьхьуниву на авчура лахънийн гьаз хъанай. Эльбрусрал бакIрай на дував 20 минут1. Ттул талихIиндаран, цаппара хIаллава ялун бивуна альпинистътурал группагу. Гайнналли «Илчилул» ттугъ бувгьусса ттул суратгу рирщусса.
Зунттуй муксса гужсса марч бияхха, ттугъ тIитIин бансса умудвагу бакъассия. Гай ялун бияврищал тIайлабацIу хьуна. Ца сурат ришлай уна, гайми кIия, суратрайн къабагьанну, лулттучIин ттугъ бувгьуну буссия»,-тIий, чичлай ур Зиябуттин цала социал сетирдай.
Шиккува жула буккултрангу дакIнийн бутан, бусалдаравун багьсса Эльбрус лавсун буссар «Аьрасатнал 7 карамат» тIисса лауреатътурал сияхIрайнгу.
Зиябуттиннун чIа учин ччай бур цIуллушиву ва цIу-цIусса тIайлабацIуртту!
