[dropcap]У[/dropcap]нгу-унгуну азар ххарарххусса вай кIива зурул дянив жу кIул хьуру чIявусса хIакинтуращалгу, медсестрахъащалгу ва «Анаварсса кумаграл» къуллугърал зузалтращалгу.
Ччай бия, гьарная кIул бувну, кIулминнахь цIухху-бусу бувну, цума чув азарданущал талай урив хъирив бувккун, жула кказитрайгу чичин, хIакьинусса къучагътурал бувсса захIматрая жулва буккултрахьгу бусан.
Буккулт цивппагу, оьвтIий, жун кумагран буслай бия чичин лайкьсса жула медициналул пишакартурая. Вания гихунмайгу хIадурссару вайнная буслангу, чичлангу. Цумурцагу талатаврия махъгу вирттаврал цIарду ялун личлайнна дикIайхха.
Наварив мудангу ххари шара, давугу канилух дурккун, къашайшалтрал кагу чIуен дурну, чIявусса барчаллагьрал махъру бавсса хIакинтуращал архIал зузисса студент-медиктурая чичинсса хIалу диривукун. Вай жагьилсса оьрчI-душру, лахьхьу-цархьхьу школалул партардах щябивкIун бивкIсса чIаважагьилтал, бивкIунни волонтертал хьуну, республикалул азарханардай цIаларгсса хIакинтуращал архIал инсаннал оьрмулул цIанийсса талаталтну.
Майрал байбихьулий МахIачкъалалив, цакуну къашайшалт гьарза хьусса гьантрай, ковидрал къашайшалт хъин булланшиврул, хIадургу бувну, щурущи бувна Республикалул цIуллу-сагъшиву дуруччаврил азарханагу. Халкьуннаву ванийн кутIану «Грязелечебница» куну учай. Шикку хIакинтал биял къахъанан бивкIукун, хIукму бувну бия ДГМУ-лул студентътурайнгу кумагран оьвчин. Майрал цалчинми гьантрая байбивхьуну, хIакьинунингу шикку «ятIулмур зоналий» зий ур кIия дус – КIамахъаллал шяравасса Камалов Амир Камиллул арс ва Ппалассуннал шяравасса ХIажимиев Билал АьвдуллагьхIажинал арс. Амир дуклай ур цIуцIавуртту хъин даймур факультетрал 5-мур курсирай, Билал – 4-муний. КIиягу, угу-увну, хъуни хьуну ур МахIачкъалалив. Шагьрулул 26-мур школагу къуртал бувну, Амир дуклан увххун ур ДГМУ-лувун, хъиривмур шинал Билалгу увкIун ур хIакиннал пиша лахьхьин.
Амирдул бусаврийну, ва азарханалий зун рязи хьуну бур 40-ксса студентътал:
«Жу шиккун бувкIсса цалчинмур кьини азарханалул жанахI, тах бишинсса кIану бакъа, къашайшалтрал бувцIуну бия, 90-ксса къашайшалт бия гай гьантрай шикку. Паща тIий, ссихI биял къахъанахъисса, укун захIматсса къашайшалтран ттущава ци кумаг бан хьунавав тIий ливчIунав. Яла, гайннал кумаг чIа тIисса яру ккавккун махъ, нигь-ццахгу ларгун, дакIгу кьянкьа дурну, шаймургу- къашаймургу буллай айивхьуссияв. БувчIлан бивкIуна жул кумаг гайннан чара бакъа аьркинну бушиву», — тIий ур Амир телефондалувух, «ятIулмур зоналува» бувккун, кIиннанмагу бигьалаган биривсса мутталий. ЩябикIанвагу хьурдай тIисса вайннахьхьун, цала бувсмур бакъасса, ххишаласса суаллу булун дакI хъякусса нагу, тIайлабацIу ва цIуллушивугу чIа куну, ттухьхьунма махъ булав, цаппара шиннардива гьунар бусса, ка сававсса хIакинтал хьуннавгу куну, цIунилгу зана хьуну, цIунилгу жула кказитрай вайннал хIарачатирттая ва къабигьасса ва бюхттулсса хIакиннал пишарая чичин. Ин ша Аллагь, дучIантIиссар му чIунгу!
Залму АьбдурахIманова
