«Шяраваллил хIакин» тIисса программалийн бувну щархъавусса азарханардай ва поликлиникарттай зун шагьрурдая бувкIсса хIакинтуран ттигу ялун дулунтIиссар социал иширттан ишла дан бюхъантIисса арцурду.
Ва даву щуруй дуссар Республикалул БакIчи Владимир Васильевлул каялувшиндаралу, ДР-лул Халкьуннал Мажлисрал Председатель Хизри Шихсяидовлулгу, ДР-лул ХIукуматрал Председатель Артем Здуновлулгу, «Единая Россия» партиялул депутат Зумрут Бучаевалгу гьурттушиврийну.
З. АьбдурахIманова
Республикалул каялувшиндарал «Единая Россия» партиялул кьамул дурсса «ЦIуллу-сагъсса ялунбучIантIимур» тIисса проектрацIун ххи бувну бур щархъавусса хIакинтуран жулла республикалул чулухасса социал пакетгу. Мисалдаран, щархъаву зун рязий хьусса хIакинтуран бакъар яхъанан бучIисса къулайсса къатри, дагьайсса куццуйсса инфраструктура, биялну бакъар даврил даража лахъ буллансса чараннугу. Вай диялдакъашивурттан хIукуматрал къуллугъчитурал ххал диргьуну дур шяраваллансса ипотека, къатта бансса субсидиялул арцу, къатта бансса аьрщи, ва цалчинма-цалчин, оьрчIру садикравун ва школалийн занази бан бигьасса шартIру. Вай чаранну, кьамулгу бувну, ишла бан хIадурну бусса бур Дарбантуллал, Ккуллал, Гъуниннал, Къизлардал, Къайтагъуллал, Сулайман-Стальскаллал, Хасавюртуллал , МахIарамккантуллал ва Лаващиял районнай.
Вай дакъасса, дур районну цачIанма зун бувкIсса хIакинтуран къатри дансса аьрщирду дуллуссагу. Мисалдаран, Хасавюртуллал райондалул депутатътурал хIукму бувну бур ва программалий зузисса хIакинтуран къатри бансса аьрщирдугу дулун, материал ласунсса арцугу итадакьин райондалул бюджетрава.
