[dropcap]Б[/dropcap]услай байкъалитIунссару, хьхьу-кьини дакъа, жард къакуну, лавмартсса вирусращал талатисса хIакинтурая. Ляхълай бакъар вайннал чувшиврия бусансса ва барчаллагь учинсса махъру.Хаснува жува махIаттал бувунну жагьилсса хIакинтурал чумартшиврул ва гьавасрал.
Жу ттинингу бусарду билаятрал хъуншагьрулий, хьхьичIунсса, даву кIулсса хIакинтуращал архIал хъуннасса хъар цайнна ларсун, зузи­сса, пишалул ххуллий цIуну шаттирду ласласисса лакрал жагьилсса хIакинтурая.
Коронавирусрал инфекция ппив хъанай дайдирхьусса цалчин­сса гьантрайва му цIуцIаврищал талай бур Хъусращиял шяравату­сса КьурбанмахIаммадов ХIажияв Шамиллул арс ва ванал кулпат, Гьун­чIукьатIрал шяраватусса ПатIимат Къарагишиев Мурадлул душ.

---

Зулайхат Тахакьаева
ХIажияв, хIакин-хирург, зий ур С. И. Спасокукоцкийл цIанийсса азарханалий «ятIул зоналий». ПатIимат, лор-хIакин, зий бур поликлиникалий. КIиягу – коронавирусрал къашавайминнащал.
«Жул чIуннарагу дакъая ва цIуцIаврия кIулшиву ласун­сса, анжагъ институтраву лархьхьу­сса вирусологиялиясса аьмсса кIулшиву дакъасса. Ца хьхьу-кьинилул дянив жун багьуна коронавирусрал цIусса журалия жуйнува жува интернетрава лахьлан, цанчирча Москавлий бусса циняв азарханардан ва цIуцIаврищал зун багьлай бия. Нава реанимациялий захIматсса къашайшалтращал зий ура. Кулпат – шаппа хъин хъанахъиминнащал», — буслай ур ХIажияв.

Хирургнал пиша язи бугьаврия тIурча, укун буслай ур ХIажияв:
— Буттал хиял бартбигьиншиврул хьуссара на хирург. Ттул бу­ттал, аьпабивул, хиял бивкIун бур хирург хьунсса. Амма, кьадарданун мукун ччай бухьун­ссия, язи бувгьуну бия полицаналмур пиша. Цала чулийн къабувксса хиял бу­ттан ччай бия на чулийн буккан бувну. ТIайламур бусан, чIивиний ттун хъинну ххуй бизайва аьраличунал пиша, навагу аьраличу хьун ччай уссияв. Хъуна хъанахъиссакссарив на ияв кIихIуллану, ттунма ччисса ххуллийх гьарча хъиннивав ягу буттал хиял дузрайн бу­ккан барча хъиннивав тIий. Ахиргу, ттуву ххув хьуна буттахсса ччавугу, аьпа­лул хIурматгу. Мукун увхра на Да­гъусттаннал паччахIлугърал медакадемиялувун. ПатIиматгу ттущал архIал дуклай буссия.

[dropcap]Ш[/dropcap]амилчинмур курсирай жу хъатIи барду. КIинналагу марцIсса ххювардай академия къуртал бувну, жу кIиягу бюджетрал гьанулий ординатура буккин тIайла бувкру Мос­кавлийн. Ординатуралия махъ зий авцIура шиккува, Спасокукоцкийл цIанийсса азарханалий.

Апрель-май зурдардий лап чIявусса къашайшалт бия. Чан­сса бакъая хъинну захIматсса тагьар дусса, хаснува 60 шинаха бувкми. Заннал жул захIматрацIун кабакьлай бур, вирус сававну ливтIу-бивщусса чансса бур. Къаччи­ссия цуя-ца инсан яла лавгун, амма хIакинтал цащава шаймургу, ххишалагу буллай бур, — тIий ур ХIажияв.
«Мархлуя ххун, ххунуя ккиж» тIисса учала бур лакрал. ДакIнийн къаувтун бацIан къабюхъанссар ХIажиявл бутта Шамил. Шяраву лавхъсса нурданул чирахъ куна­сса жагьил уссия, аьпабиву. ДакI марцIну зий уссия Дагъусттаннал УБЭП-рай, республикалул экономика дацлациминнащал талай.

Лавмартсса ккуллалул нязаннив бяличIан бувссар чув мяш хьун­сса Шамиллул оьрму.
Ласнал чаннасса аьпагу бурув­ччуну, ганал хъаргу цийнна ларсун, буттал цIанин лайкьну, бу­ттал рухI ххари хьунсса тарбия дуллуну, хъуни бунни Аьишатлул арс ва душ. Вана хIакьину Шамил кIулцири ганал арсная пахрулий. Ххариссару, ччима нитти-буттал цала хьурдай чинсса арснал бивкIулул лахIан увсса Чанкурал бакI гьаз дансса чув арсная махъ личIаврия.

[dropcap]Б[/dropcap]арчаллагь вин, ХIажияв, бу­ттал хиял бартбигьаврицIун, агьалинал оьрмурду ххассал буллай ушиврухлу ина хIакьину. Вил бутта къачагътуращал талай ивкIхьурча, инагу лавмартсса вирусращал талай ура. Урувччуну лякъиннав ина Заннал! Буттан къабуллумур оьр­мулул бутIа вин буллуну лякъиннав! Вил ужагърай лавхъсса чани чан къахьуннав! Итаннав ина вила аьзизсса ПатIиматлущал дунияллия щалихханнин!