[dropcap]Д[/dropcap]агъусттаннал региондалийсса «Единая Россия» партиялул отделениялул пресс-къуллугърал баян бувсса куццуй,
июнь зурул 9-нний онлайн-режимрай агьалинал масъаларттах вичIи дирхьунни АьФ-лул Думалул депутат Аьвдулмажид МахIрамовлул.
Имара Саидова
Ва кьини депутатнайн бувксса, Каспийскалий ялапар хъанахъисса Паризан Аьлиева аьрзирай бия шагьрулувусса щинал чапалшиврия. Ванил бувсунни дукра дансса, хIачIансса щин ттучандалия ласласаврия азурда хьуну бушиву, мудан щин машан ласлансса каши-кьудрат цинявннал дакъашиву. МахIрамовлул кIицI лавгунни инсантурал цIуллушиврийн багьайсса ва масъалалух бунияласса къулагъас дуван аьркиншиву. Депутатнал Роспотребнадзорданийн гьан бунни ва масъалалул хъирив лаяву тIалав буллалисса чагъар.
МахIачкъалалиясса ишбажаранчи Алжанат АхIмадова оьвтIий бия цуппа заллусса чIирисса бизнесран кумагрансса субсидияртту къабуллай инжит бувну бушиву бусан. МахIрамовлул балжину бувчIин бунни цумур чIумал ва та ласун бюхъайссарив бизнесрансса субсидияртту ва ми ласунсса анкета тIайлану дуцIин дансса куц. Мукунна ва хъамитайпалун, кумаг хIисаврай, дунни юристнал консультациягу.
Махъсса зурдардий хIасул хьусса тагьар сававну, кулпатрал ахIвал-хIал кIюла бувккун, хъинну азурда хьуну бушиву буслай бия ЦIуссалакрал райондалий ялапар хъанахъисса Жамиля Мутаева. Депутатнал бувсунни вайннал кулпатрангу кумаг баншиву.
Ва кьини депутатначIан ялагу оьвтIий бия социал арцу дулаврил, давурттал дузал баврил, ххуллурдайх асфальт бакьаврил ва цаймигу масъаларттал хIакъираву. Депутатнал кIицI лавгунни, цайнна вихшала дирхьуну, оьвкусса инсантурал цинявппагу масъалартту ччясса мутталий щаллу баврил ялув ацIантIишиву.
