Проектрал лагрулий – ГьунчIукьатIрал культуралул къатлул ремонтгу
[dropcap]В[/dropcap]ай гьантрай Аьрасатнал Федерациялул культуралул министрнал хъиривчу
Ольга Яриловал каялувшиндаралу хьунни видеоконференциялул журалийсса совещание. Муний гьуртту хьунни Дагъусттан Республикалул культуралул министр Зарема Буттаевагу.
Бадрижамал Аьлиева
Ва кьинисса ихтилатру хъунмурчIин бия «Культура» цIанилусса национал проект Ухссавнил Ккавкказуллал ва Кьиблалул федерал округирттай иширайну щаллу даврин хасну дурсса давурттаясса.
Мукун, Аьрасатнал регионнал культуралул бакI дургьуминнал бувсунни ва проектрал лагрулий цалла-цалла региондалий ци дурссарив ва ци дан дакIний буссарив.
«Культура» проект Аьрасатнал Президентнал ва АьФ-лул ХIукуматрал цIакь дурссар ванияр кIира шинал хьхьичI, 2019-ку шинал январь зуруя шинмайрив жулва билаятрал регионнай байбивхьуссар ва проект иширайну щаллу дуллай.
Жулла республикалия тIурчан, «Культура» проект жучIара чувнияргу щуруй дуссар, мунил лагрулий бакIрайн ларсъсса цинярдагу давуртту дуллалиссар сакин бувсса графикрайн бувну. «Культура» проектрал шаннагу подпроектрал («Культурная среда», «Творческие люди», «Цифровая культура») ххуллу-ххуттай ларгсса шинал жучIара къачансса давуртту дурссар. Вайнна миннувасса цаппара: Дахадаевуллал райондалийсса Оьргърал шяраву ва Къайтагъуллал райондалийсса Баршамай шяраву бувссар культуралул къатри, республикалул 4 райондалул культуралул ва бигьалагаврил центрдай дурссар капитал ремонт, республикалул районнал ишла буллан лавсъссар уттизаманнул кьай-кьуйлул ва оборудованиялул щаллусса 7 автоклуб, республикалул культуралул 10 зузалал пишакаршиву ларай дувайсса курсру бувккуссар Краснодардал паччахIлугърал культуралул институтрачIасса КIулшиву дулаврил ва пишакаршиву ларай даврил центрданул базалий, 240 зузалал тIурча – пишакаршиву ларай дурссар дистанцион режимрай, яни манзилданий (пландалийн бувну, аьмну бакIрайн лавсъссар 388 зузалал пишакаршиву ларай дуван). Проектрал лагрулий республикалий дурссар чIярусса фестиваллу, форумру, выставкарду.
«Культура» национал проектрал лагрулий ва шинал дуван бакIрайн ларсми давурттавух дур республикалул 6 шяраваллил культуралул къатлул, миннувух Лакрал райондалийсса ГьунчIукьатIрал шяраваллил культуралул къатлулссагу, капитал ремонт даву. БувантIиссар «Лезгинка» ансамбльданул КъавтIаврил къатта. Вай давуртту даврил кьутIирду чирчуну дур, зий сукку хьун ялугьлай бур хIасул хьусса тагьар даххана хьуннин.
Культуралул 3 дуккаврил идара (миннувух Г. ХIасановлул цIанийсса МахIачкъалаллал музыкалул училищагу) щаллу бувссар дуккавриву аьркинсса литературалул, музыкалул инструментирттал ва махъсса кьай-кьуйлул.
Ва шинал щаллу дуван бакIрайн ларсми давурттал сияхIрай дур Дарбантуллал музей-заповедникрал базалий «Артефакт» цифровой платформалул гьанулийсса мультимедиа-гидрал проект давугу.
