[dropcap]З[/dropcap]агьраний, к1ира нюжмар ххишалагу хьунни ттул кIулшилулща, ина утти ттунма, цачIу щябивкIун, чичлай, ккалай, аьтIий-хъяй, хъярчру буллай ва дакIнийсса буслай,
жула гъилисса ва чанна лавхънасса кабинетраву къаккаккантIиссара тIисса пикри лаласун къабюхълай. Лалавсун ца чулийн буккан бугу-къабюхъанссар.
Залму АьбдурахIманова
Виятугу, жула ссурваврал куннасса арардаягу чIявусса бусланссагу бур, дакIнийн бутланссагу бур, амма, кьакьарттуйсса кьюлтI учин захIматсса къурхъ сававну, махъругу къуркъа хъанай бур. Къаххива ттун ттула оьрмулуву вай пашмансса ххару виха чичин багьансса.
Инаяхха на, вила инсаншиврулгу, хасиятрал ххуйшиврулгу, чанна лахъан бувсса кабинетравун кьамулгу бувну, «Илчи» кказитрал редакциялул давривух най бунува хIала буххан бувсса. Вила дакIнил ттюнгъашиврулгу, нахIусса мукъулгу жула дянивсса дусшиврул гьану бивзсса. Агь, ца ххирассияхха ттун вищал чяйлул стакандалух дакI кIидачIлан, ина вихшалдарай ттухьва бувсмур ттувува цIакьну ябан.
Загьраний, ина ттул даврил уртакь бакъаявча, ина ттул хъунмур ссуяв. Вил дакIнийхтунусса маслихIатругу, насихIатругу, оьрмулул дарсругу хъамаритан шайссарив? Гьичгу къахьунссар! Ина бияв жул «Илчилул» ттарцI, кказитрал вирдакI.
Ххирассия ттун, ина ялун бучIаннин чяйникгу бивзун, вих жула кабинетраву ялугьлан. Редакциялул жанахIравун ина бувхссагу ттун тихава бувчIайва, ина гьарнащал буллалисса яхши-хашрайну ва хъярч-махсарарттайну. Жуламур кабинетрал хьулухун бивукун: «Буххугъарив, Загьраний, анаварну жуннийнма. Ина шаппай бухханнин ялугьлай буссияв», — тIун бикIайссияв на. Лажиннича, утти вай гьарзат ттул дакIнийнбичавурттавурив личIантIисса?
Загьраний, жулла икьралгуния мукунсса дакъассия.
Вила аьзизсса уссу Загьидинахсса жижара бан, МахIачкъалалив зана шайхту, вичIан бучIанну кусса икьрал дуссия. Жуламур икьрал мукунсса диркIнугу, Аллагьу Тааьланаллив жу вичIан КIямашавва буцинсса чичру хIадур дурну диркIун дунуккар. Жу бугу-бучIантIиссару ина бугу-бувну, хъунмагу хьуну, хIакьсса лакку душнил хасият тарбия дурсса КIямашрал шяравун. Ин ша Аллагь, ва цIанасса аваралул ца бази хьувкун.
Загьраний, алжаннул ххари баннав инагу, вил аьзизсса уссу Загьидигу. Уссу акъасса дуниял къаччишиврул лавгхьунссара ина жуяту. Зу бияв цаннан ца ххирасса, цаннал цаннаха хъуннасса аякьа дусса, цаннал ца бувгьусса уссу ва ссу. Имандалий лавгун лякъиннав, зул махъ ливчIнахьхьунгу цIуллушиву дулуннав!
