Ххувшаврил таварихран хас дурсса мероприятиярттал лагрулий Гъумук тIивтIунни Вирттаврал Аллея. Гъумучиял шагьраххуллуцIух Хъун паркрал щалагу чIирайх лавхъун бия Дагъусттаннал Вирттаврал суратирттащалсса баннерду, минная гьарцанная кутIану бугу-бувсун.
Зулайхат Тахакьаева
[dropcap]А[/dropcap]ллея тIитIинсса пикри бивкIссар май зурул 9-нний, Ххувшаврил Парад дусса кьини. КIулсса куццуй, Гъумук Ххувшаврил парад дайссия лайкьсса даражалий, учин бюхъанссар, вирттаврал цIардан лайкь хьусса хъунисса шагьрурдал даражалий. Коронавирусрал инфекция ппив хъанахъаву сававну, я Парад къадурну, я Аллея къатIивтIуну ливчIссия.
Утти, билаятрай Ххувшаврил Парад дуллалисса гьантрай, тIивтIунни Аллея. Шиккува кIицI бан, Гъумучиял Хъун парк бакьин бувссар республикалул бюджетрал арцух, кIанттул сиптардан кабакьу буллалисса «Единая Россия» партиялул проектрал лагрулий.
Республикалийсса эпидемиологиялул тагьар хIисаврайн ларсун, мероприятиялийн чIявусса агьлу бавтIун бакъая.
— Жува яхъанай буру ппухълуннал, душманная бугу-бурувччуну, жуйнма аманат бувсса аьзизсса билаятрай. Ванил ялун бучIантIимургу хъунмурчIин жагьилсса никирал кIунттихьри бусса, — увкунни райондалул бакIчи, « Единая Россия» партиялул кIанттул отделениялул хъунама Юсуп МахIаммадовлул.
Ахирданий мероприятиялий гьуртту хьуминнал вирттаврал суратирттацI дирхьунни тIутIив.
