ХIакьину Дагъусттан коронавирусрал захIматсса тагьар дусса регионнал сияхIрайн лавсун бур. Март зурул 27-нния шинай, ва кIул дакъасса азарданущал талай,

уххаву къакIулну инсантурал оьрмурду ххассал буллай зий ур Республикалул инфекциярдал азардал центрданул азарханалул лавайсса категориялул хIакин-инфекционист, АхIмадлул арс Жабраил ХIасан-ХIусайнов.

---

Имара Саидова
Жабраил ур ЦIуссалакрал райондалийсса Аьхъардал шяравасса. 2005-ку шинал ванал къуртал бувну бур Аьшттарханнал паччахIлугърал медициналул академия. Ваниннин ванал бувккуну бур Дагъусттаннал ва туркнал колледж. Ххуйну кIулну бур ингилис ва турк мазру. 2006-2007-ку шиннардий Аьшттарханнай клиникалул ординатурагу був­ккуну, ларсун дур инфекциярдал азарду хъин дай­сса хIакиннал сертификат. 2007-ку шиная шинай ва зий ур Республикалул инфекциярдал азардал центрданий инфекциярдал хIакинну. Центрданул азарханалий зузиссаксса хIаллай Жабраил машгьур хьуну ур чIярусса журардал инфекцияртту дусса, захIматсса къашайшалт хъин баврийну. Цалла даву ххуйну кIулсса хIакиннал цIа ччяни кIул шайхха агьалинан, ши­ккусса чIявуми къашайшалтгу Жабраил ХIасан-ХIусайновлул цIа дургьуну бувкlсса бур.
Дагъусттаннай коронавирус дусса къашайшалтращал цалчин хьунабавкьумигу хъанахъиссар Республикалул инфекциярдал азардал центрданул хIакинтал. Билаятрай коронавирусрал инфекция ппив хъанай дарчукун, жулла республикалий хьхьичIва-хьхьичI, укунсса къашайшалт кьамул буллансса шартIру дузал дурну, хIадур бувссар ва центрданул азархана, ми къашайшалт хъин буллансса хIакинтал ва технический персонал. ВичIи дишинну Жабраиллул цалва бусласимуних.
— ХIакьинусса кьинигу даву куклу хьун дурар, щалва азархана бувцIуну бур коронавирусрал инфекция дусса къашайшалтрал. Март зурул 27-нния шинмай, бацIаву дакъа, 60-70, кувний 80-хъул къашайшалт кьамул буллай зий бивкIру. Къашайшалтравух бур жагьилмигу, бугьарамигу, цивппагу тагьар захIматнийн дирну бувцуну бувкIсса. Цавайннал бигьану духIлай бур ва азар, цавай тIурча, лахъи лаглай, захIматну бур хъин бан. Шикку зузисса хIакинтурал, медсестра­хъал ва технический персоналданул цала кулпатирттащал къаккавккун, бацlаву дакъа зий кIивахъул барзру хьунни. ХIатта жула кулпатирттащал, гъан-маччанащал телефондалувухвагу хавар бусан­сса чIун дакъа зий бивкIру.
Чан къашай, коронавирусрал лишанну дуну, нигьа бувсун, телефондалувух цIухху-бусурду буллалисса инсанталгу, мигу, къулагъас дурну, ци бан аьркинссарив бувсун, рахIат буккан бару. Мудан ттухара дуаьлийсса нину хъювусул дуклай дикIай, цурда оьвтIийни, на телефондалувух къашайшалтращал гъалгъа тIий, цийнма яржа къабиллай буну тIий: «Я ттул арс, къабучIиссарив, цайми ялугьлагьи бувну, цаллагу ттухьхьун най дуна жуав дулун», — тlий. Коронавирус дусса къашайшалтращал зун бивкIния шинмай чIявуми хIакинтал ва медсестрахъул зурдардий шиккува ялапар хъанай буссар. Буниялагу, инсантурайх кьини дурккунни, вирусрал биян буллалисса баларду оьсса бур. Коронавирус ппив хьуннингу ттул шикку зий, личlи-личlисса инфекцияртту дусса инсантал хъин буллай, биялсса даврил опыт хьуссия. Амма вай кIива зурул мутталий дурсса даву шиннардий дурмунищал архIал дарцIунни. Зу вих къахьунссару, кувннал кувннахь махъ бусансса, ихтилат бансса мажал къабикIайва.
ЦIана на ура «Приемный покойравун», «Анаварсса кумаг­рал» машиналий бикlу, укунма бикlу, бувцуну букIлакIисса къашайшалт кьамул буллай, ми, тагьарданух урувгун, отделениярттайн гьан буллай. Бувцуну букIлакIисса личIи-личIисса оьр­мурдал къашайшалтрах урувгукун, хъиннува бувчIлай бур коронавирусрал инфекция цуксса рахIму бакъа­сса дуссарив. Соцсетирдайгу, укунмагу инсантал цукунчIав вих бан хъанай бакъая вирус душиврийн. Укунсса къашайшалт ккаклаки­ссаксса хIаллай ттун цал ххишалагу бувчIунни ва инсаннан цанма хаварвагу бакъа ла­хъайсса азар душиву, мугу кувннал бигьанна, кувнналгу захIматну духIайсса душиву. Мунияту на цал уттигу миннат буллай ура, Роспотребнадзорданул чулухасса тIалавшиннарду дуруччияра, аьркиншиву дакъа кьатIу-шав мабуккаванни тIий. Зула аьркиншиврий кьатIув бу­ккарчангу, кIира метралул манзил бувгьуну бакъа, инсанначIан гъан машару, лаххира маскарду, ишла дуллалияра дезинфекция дайсса растворду, хIарачат бара чIявусса инсантал бусса кIанттурдачIан гъан къахьун. Вай бигьасса тIалавшиннарду биттур даврийну зу зулагу, зула гъан-маччаналгу оьрмурду сахъла буллалиссару.
Махъсса гьантрай къашайшалт цахъис чан хъанай байбивхьуну, дакI рахIат дуклай дур. Цуксса жу, хIакинтал, хьхьу-кьини дакъа къашайшалтрал оьрмурду ххассал буллай, зурчангу, ва балаллул ахир къадучIантIиссар, агарда инсантурал цалва цивппа мюхчан къабулларчан, — тIий ур Жабраил.
Мяйжаннугу, бувчIлай бур хIакьину цуксса хъуннасса хъар лархъун най буссарив хIакинтал. Цалва оьрмурдугу нигьал ва хьулданул дянив бивхьуну, цикссагу инсантурал оьрмурду ххассал буллалисса хIакинтурал бивзсса гьарицагу ша къучагъшиврун ккаллиссар.