[dropcap]Р[/dropcap]еспубликалул анаварсса кумаграл азарханалул сочетанный патологиялул отделениялул заведующий, Жамбулатлул арс Темирболатов МахIаммадссалам республикалул хьхьичIунсса хирургтуравасса ца ур.
Андриана Аьбдуллаева
МахIаммадссаламлул 2003-ку шинал къуртал бувну бур Дагъусттаннал медициналул университет, 2005-ку шинал – хирургнал пиша лахьхьайсса ординатура. 2007-ку шинал Анаварсса кумаграл азарханалий сочетанный патологиялул отделение тIитIайхту, ваний каялувшиву дан тапшур бувну бур бюхъу-бажар бусса жагьилсса хIакиннайн.
Ваналгу цайнна дурсса вихшала зия къадурну дур. Ттун ттунма цикссагу хьунабавкьунни ва отделениялий операцияртту бувсса, шиккусса хIакинтурая, хаснува отделениялул каялувчиная рязину ливчIсса инсантал. МахIаммадссалам мяйжаннугу кIулшивуртту дусса, жаваблувсса хIакин ур. Ва ур медициналул элмурдал кандидат.
«МахIаммадссалам хъинну цIими бусса хIакин ва ка сававсса хирург ур, рязину ливчIру ванал бувсса операциярттая», — тIий, ва барчаллагьрай дакIнин утлатисса къашайшалт чансса бакъар.
Коронавирусрал азар сукку хьусса цалчинсса гьантрайва сочетанный патологиялул отделениялийгу ва азар дирсса къашайшалт хъин буллан бивкIунни.
МахIаммадссаламгу, азарханалийра хьхьурду дичлай, «ятIул зоналий» зий уссия та яла хIакинтал бурукъавччуну бивкIсса чIумал. ХIайп, цувагу къашай хьунни. Аллагьнал цIими бишиннав, цIуллушиву дулуннав.
