[dropcap]М[/dropcap]айрал 26-нний Дагъусттаннал БакIчи Владимир Васильевлул Оператив штабрал ирглийсса батIаву дунни Бущихъиял шяраву.
Республикалул БакIчинал бувсунни Бущихъав дузал бувсса аьралуннал госпитальданул хIакъиравусса цалвами пикри-зикрирду. Мунал тIимунийну, му госпиталь бувну бур Билаятрал Президентнал тапшурлугърайну, цаппара гьантрал дянив. Мукунмасса госпиталь бувну бур Буйнакскалийгу.
«Кумаг буван шихун бувкIунни духтуртал, дузал бунни кIанттул халкь хъин буллан уттигу 350 кIану»,- увкунни Владимир Васильевлул.
Дагъусттаннал БакIчинал бувсунни хъинсса хIала-гьурттушиву душиву аьралитурал ва муниципалитетирттал бакIчитурал дянив.
Региондалул каялувчинал гьарза-гьартану бувсунни республикалийн зун бувкIсса реаниматологтурал, эпидемиологтурал, пульмонологтурал даврия.
АьФ-лул цIуллушиву дуруччаврил министрнал хъиривчу Виктор Фисенкол бувсунни хьхьичIмур кьини Владимир Васильев хьунаавкьуну ивкIшиву Аьрасатнал Роспотребнадзорданул каялувчинал хъиривчу Юлия Деминащал ва мунил тамансса маслихIатру ва республикалун иширайнусса кумаг бувшиву.
«Тагьар даххана хъанай дур. Буйнакскалийсса госпитальданий уттубишин бунни цалчинсса къашайшалт. Койкардугу гьарза хъанай бур, хIакьинусса кьини бур 3000-ксса илкинсса кIану. Гьарза хьуну бур тестругу: майрал 24-нний бия 2145 тест. ЧIал къавхьуну буванну 3000 тест».
Республикалийсса санитар-эпидемиологиялул тагьардания ва дуллалисса давурттая бувсунни ДР-лул Роспотребнадзорданул управлениялул каялувчи Николай Павловлул. Мунал тIимунийну, коронавирусрал инфекция дайдирхьуния шинмайсса къашайшалт гьарза шаврил бущи ялавай багьну бур 8-ва. ХьхьичIмур нюжмардух бурувгун, цаппара районнай тагьар цалий дарцIуну дур. Бувсунни мукунма тестру даврил хIакъиравугу.
Республикалул цIуллушиву дуруччаврил министр Жамалуттин ХIажиибрагьимовлул бувсунни АьФ-лул Президентнал тапшурлугъру бартдигьаврил давурттая. Мунал тIимунийну, цIанасса ппурттуву илкинсса койкарду бур МахIачкъалаливгу, цайми шагьрурдайгу. Дагъусттаннай зий бур федерал центрдания бувкIсса пишакартал, ми, кlантту-кIанттурдайн лаглай, кумаг буллай бур хIакинтуран. Министрнал бувсунни кислородрал дузалшиврул хIакъиравугу.
Оператив штабрал батIаврий махъ лавхъунни Дагъусттаннал ГО-лул ва ЧС-рал министр Нариман КазимахIаммадовлулгу.
КIантту-кlанттурдайсса тагьардал хIакъиравусса ихтилатру бунни мукунма цаппара шагьрурдал ва районнал бакIчитурал.
Владимир Васильевлул кlицl лавгунни коронавирусрал инфекция сававну ливтIусса хIакинтурал кулпатирттан страхованиялул гарантиярттал арцу бюхъайссаксса ччяни дулун аьркиншиву.
Артем Здуновлул муниципал сакиншиннал бакIчитурайн тапшур бунни му масъалалул ялув бацIаву дуван.
