МахIачкьалалив бакьин бувантIий бур 85 кIичIира

Гаджимагомед Гусейнов

Июндалул 19 нний федерал ххуллул агентствалул каялувчинал хъиривчу Игорь Костюченкол каялувшиврий хьунни «Мюхчансса ва хьинсса ххуллурду» тIисса национал проект дузрайн дуккан даврил иширттан арцу харж даврил масъаларттал хIакъиравусса селекторданувухсса батIаву.


Муний гьуртту хьунни ДР лул ХIукуматрал Председательнал Цалчинма хъиривчу ХIажиммахIад ХIусайнов, ДР- лул транспортрал ва ххуллурдал хозяйствалул министр Ширухан ХIажимурадов.ва цаймигу. Ххал бивгьунни нацпроектрал лагрулий дузал буван аьркинсса масъалартту цила чIумал ва ххуй-хъинну бартбигьаврил масъала, хаснува — 2020 шинал кIилчинмур кварталданул хIасиллайну цIакьгу дурну, регионнайн тапшур дусса бюджетрал арцу салкьи даву.

Дагъусттан гьуртту хъанай бур «Ххуллурду», «Ххуллурдал хозяйства лядуккаврил аьмссасистемалул чаранну» ва  «Ххуллийх бачаврил мюхчашиву» тIисса нацпроектирдавух. Регионнал проектирдан дичайса арцул аьмсса лагру дур 1,8 млрд къуруш, миннавату 800 млн къуруш — ми федерал бюджетрал арцур, 1 млрд къуруш -республикалул бюджетрал арцур.

БатIаврий тIимунийну, «Ххуллурду» тIисса республикалул проектрал лагрулий бакьин бувантIий бур 85,3 километра ххуллурдал ва МахIачкъалаллал кумагран, миккун харж дувантIий дур 1,6 млрд къуруш.

Республикалул даражалул 5 объектрай дайдирхьуну дур давуртту.

МахIачкъалалив бакьин баврил давуртту дувантIий дур 85 кIичIираву, ми давуртту лахъи лагантIий дур гьашину ноябрданийннин.

ХIасан  Аьдилов