[dropcap]К[/dropcap]итайнал Жагьилтурал федерациялул сипталийну хьусса, щаллагу дунияллул халкьуннал лагрулийсса суратирттал конкурсрай ххув хьунни Дагъусттаннайгу,
кьатIувгу машгьурсса суратрищу, Вилттащиял шяраватусса МахIаммадал арс, Анвар АхIмадов. Ва конкурс хьунни «ДакIний бити ковидращал талатисса лахIзарду» тIисса цIанилу.
ПатIимат Рамазанова
Аьрасатнава конкурсрайн дуркIун дур 1000 сурат, миннувату Жагьилтурал иширтталсса буллалисса федерал агентствалул 13 язи дургьуну дур. Миннувух Анвардулссагу. Ухссавнил Ккавкказнавату ххув хьусса ца ва ур. Анвардул конкурсрайн гьан дурну дур Дагъусттаннал азарханардайсса «ятIул зоналийсса» лахIзарду ккаккан буллалисса суратру. Конкурсрай ххув хьуминнайн ялунчIил Китайнавун оьвтIий бур.
Анвар барча уван оьвкуну, на ца-кIива суалгу буллуссия ванахьхьун. Анвардул бувсунни суратру рищаврихун цува машхул хьушиву 11 шинал хьхьичIва, Художествалул-графикалул институтрал 1-мур курсирай дуклакисса чIумала. Ванал ппу МахIаммада, аьпа биву, республикалий ххуйну кIулсса инсан ур, нину Хлют тIисса шяраватусса бур.
Анвар зий ур МахIачкъалаллал ресторандалул медиа сфералуву. Буттал пишкаш бувну бур ванан цалчинсса камерагу. Буттащал зунттавун чIярусса шяраваллавунгу ивну ур. Дагъусттаннал паччахIлугърал университетрал тарихрал факультетгу къуртал бувну, Анвардул ппу, Дагъусттаннал культуралул лайкь хьусса ишккакку, зий ивкIун ур Тарихрал, культуралул ва архитектуралул гьайкаллу дуруччавриха зузисса Республикалул центрданул хъунаману. Цувагу дунияллийн увккун ур 1963 шинал апрельданул 18-нний, гьамин Гьайкаллу ядаврил кьини. Цалла даву хъинну ххирасса, архитектуралул ва тарихрал гьайкаллу ядуван шаймур буллай ивкIсса МахIаммадан суратру ришлангу ххирасса диркIун дур, даврил иширай зунттавун нанинийгу каруннища фотоаппарат хIура къабайсса бивкIун ур. Суратру ришлансса гъира Анвардуйн буттая ирсирай бивну бур учирчагу тIайлассар.
Коронавирусрал азарданущал талатиминнал суратру ришлан дакIнийн багьаврил хIакъиравурив Анвардул укун бувсунни:
— Жулва инсантал, вирусрайн вих бакъа, бири-биривмур тIутIисса ппурттуву, ттун халкьуннан ккаккан дуван ччай бия, кIива мукъуйну учин, «коронавирусрал сичча», халкьуннан бувчIиншиврул цукун нигьачIисса, пасатсса азар дуссарив ва…
Журналистътал кьаламрах талай гьаз шайсса кунма, Анвар АхIмадов коронавирусрайн данди увккун ур фотоаппаратрал кумаграцIух. Мунаща му давугу дюрхъуну дуван шаврил барашин дуллалисса хIасилли сий дусса дунияллул халкьуннал дянивсса конкурсрайсса ххувшаву.
Уттигу цимилагу буцинссару жува ванал караматсса суратирттал дунияллийн. Так вания тинмай Анвардун пашмансса иширттал суратру ласлан къабагьаннав, ххарисса ва чаннасса лахIзардал чанипарсса дунияллийн кIункIу буваваннав жува!
