ХIажи МахIаммадов

[dropcap]А[/dropcap]ьбдулкьадирдул арс МахIаммадов ХIажи увну ур 1935-кусса шинал Уручуллал шяраву. Дагъусттаннал паччахIлугърал университетрал физикалул ва математикалул факультет бувккуну махъ зий ивкIун ур Бархъаллал дянивмур даражалул школалул директорну.

1962-1963 шиннардий ккалай ивкIун ур Бакуй аспирантуралуву. Муния мукьах ва лавгун ур стажер-докторантну Польшанал хъуншагьру Варшавалийн. Тиккура дурурччуну дур математикалул элмурдал докторнал диссертациягу. Муниятур ванал цIанил ялун ххи бай­сса «Польский» тIисса махъгу. 1964 шиная шинмай ванал оьрму бавхIуну бур Дагъусттаннал хъунмур вузрацIун: доцент, кафедралул каялувчи (30 шинай), профессор, Дагъусттаннал лайкь хьусса учитель.
ХIакьинусса кьинигу тIалавну бур ХIажинал опыт ва кIулшиву, ккалай ур лекцияртту цанма маччасса университетравугу, Халкьуннал хозяйствалул вузравугу.
1. Цукунсса хьуна оьрчIний вийнма яла гужсса асар биян бувсса зат, иш?
1948 шинал август зурул 28-нний шахталул директорну зий ивкIсса ттул ппу, шахталуву унува, газрал загьрулул оьрмулуцIа увссар. Жу, мукьа уссугу, ца ссугу, ятинталну ливчIунав. Ниттил ПатIиматлул яхIлицIух, ччаннайгу бавцIуну, чивунгу бувкссару.

2. Цими никирайн дияннинсса кIулли вин вила ппухълуннал нясав? Буси вила архманал цIа.
Ттул буттал агьулданийн Кьадихъул учайссар, цанчирча буттал ппу Аьбдулкьадир 8 щарнил кьадишиву дурсса инсан ивкIссар. Бутталгу 14-15 шинай аьраб элму дурккуссар, миннувух – Кьукуннал ХIажи-муса-хIажинал мадрасагу.
Уттигъанну уссу Зайнуттиннулгу, нагу буккан буварду «Тухум Кадиев Уллучаринских» тIисса лу. Микку дуссар ккаккан дурну сайки 15 ник. Ниттилмур тухумралгу жуйнна дияннинсса 5 ник кIулли. Миннавасса ца Агълар-ханначIа нукарнугу ивкIссар. Му авадансса Хадижавхъал МахIаммадлучIан Агълар-хан 40 инсаннащал хъамалу увкIунгу ивкIссар.

3. Инсаннал хасиятраву винна яла ккарккун къаччимур лишан?
Лавмартшиву, пахру-ххара, чIиппиршиву.

4. Вила оьрмулуву яла алши бакъамур шин?
1948 – ппу ивкIусса шин; 1982 – нину диркIусса шин; 2016 – 47 шинавусса ттула арс Арслан ивкIусса шин; му бивкIу бухIан къавхьуну, 15 гьантлува ттула кулпат Розагу аьпалухьхьун лавгссар. Роза Карашатусса цIа дурксса МахIаммад Абакаровлул душъя. Севастополлай мунан цIасса кучагума буссар.

5. Яла алши бумур шин?
1964 – нара Польшанаву докторнал диссертация дурурччусса шин; 2013 – арснал душ Карина МГУ-лувун кьамул бувсса шин; 2014 – арснал арс Аьбдулкьадир МГУ-лувун кьамул увсса шин;
2019 – арснал арс Зайнуттин Бауманнул цIанийсса университетравун кьамул увсса шин.

6. ВичIара циксса арцу хьувкун, дигьаларгун дикIанссия вил дакI?
Арцуйн ххишалану кIункIу тIисса хасият ттуву тачIавгу дакъассия.

7. Инсаннал тахсирдавасса цумур тахсир хьунссия вища багъишла битан?
Ттул ччяни ссибизайссагу, ччяни лиххайссагу хасият дуссар. Мунийну, ттула пикрилий, аьйкьуманая ялттугу ччяни учIайссара.

8. Бувагу къабитан?
Ванинсса жуавгу хьхьичIмуниву дуссар.

9. Ссан диял къашай вил чIун?
Зирангсса инсаннан тачIаврагу чIун диял къашай­ссар. Жува Илья Обломовхъул бакъахьувкун.

10. Бартлавгун ччисса вила шанма мурад?
Цалчин, на хъунама ухьувкун, ттуярда хьхьичI ттула уссурвавран, ссин ахират нясив къадаву; кIилчин, дуниял даркьуну личIаву; шамилчин, ттула хъиривсса наслулун цала гьунардануха, хIарачатраха лавхьхьусса тIайлабацIу шаву.

11. Вила оьрмулуву хъинну ххирасса кIантту бувгьусса шама инсаннал цIа (нину-ппу къахIисавну)?
Уссурвал, ссу, ниттирссу Булбул; арсру – МахIаммад, Арслан, МахIаммадхIажи; душру – Зоя, Мадина; арснал кулпат – Изольда. Сайки 50 шинай ттущалла дусшиву дурурччусса Хавчаев Аьбдул (судья), Ххутрал Гъаза (лакрал Левитан).

12. Винма ххуй бизайсса хъамитайпалул сурат?
Ттула оьрмулул дус Роза.

13. Вина кьамулсса чув-ада­минал сурат?
Оьрмулул гьарца чулуха ккаккиялунсса уссу Зайнуттин; гьарзадраву усттарсса уссу Чарак.

14. Агарда бюхъайсса бивкIссания, инава ци кIанттай, ци чIумал увну ва ци билаятрай яхъанай ччива вин?
Уттисса заманнай ца кIанай яхьун шайссарив? Ттун гьарца кIану бакьай, ттуцIуна навагу авкьуну ухьурча.

15. Ссаяту бикIай вил яла хъунмур пахру?
Ттула гъан-маччаминнаву кьадарсса хасият дакъашиврия.

16. Цукунсса дур вил виятурасса къарязишиву?
Ца-ца чIумал хIакьину дан шаймур гьунттийнин махъун ритан буккай.

17. Яла ххирамур дукра?
Аьпа биву, ттул кулпат Роза ххишала бакъа итххявхсса дукрардал усттаръя. Ца заманнай, конференциялийн бувкIсса профессортурал (кIия адамина, кIива хъамитайпа) увкуна: «Жу сайки щалла дунияллийх бувксса халкьру, укун личIи-личIисса нахIусса дукрарду дайсса инсан къахьунабавкьуссар», — куну.

18. Яла къаххирамур дукра?
Диндалийгума чивчуну буссар дукралий аьй рищун къабучIиссар тIий. На навагу, цал буттаяту, яла шама цаймигу аьлимчуначIан занай, цаппара аьраб элмулул луттирду бувккуссар.

19. Ссаятусса бикIай яла хъунмамур хIучI?
Пахручи акъахьурча, аьркин бакъасса хIучI къабикIайссар.

20. Хьуссарив вил оьрмулуву винна инара ттинин багъишла ритан къахъанахъи­сса къел?
1944 шинал жул шяравасса кIива хъамитайпалул на Къуппиял (ХIапшима) дазуйсса хъув интту дахьа бувгьусса нувщи биххан гьан увну, шавхьун, ца кIива ттунгу буллуну, бувкуна. Ча кIул хьуссияв, буттан кIул хьуну, шаппату буллуну нувщи, хъинну аьйгу дурну, тай нава нувщи бивхсса ханнакьирттаву бугьан гьан увнав.

21. Лавгсса заманардавасса цIанихсса инсантуравасса цуманащал хьунаакьин ччива вин?
Ххишала бакъа хъунмасса гьунарданул заллусса, ахират ччяни нясив хьусса, Карашатусса ттула дус Къаллаев Сяидлущал.

22. Цукунсса бур, вил пикрилий, лакрал миллатрал яла хъунмур буруккин?
Цайминналмур буруккин ци буссарив ттун къакIулли, бусанна ттуламур. Цалчин, лакрал жагьилтал гъирарай ккалай бакъар. Сайки кьунния лирчусса шиннардий математикалул, физикалул аспирантуралувун кьамул бансса оьрчI-душ буклай бакъар. КIилчин, лакран лакку маз къакIулну бур. КIулмигу – хъунимигу, мюрщимигу – оьрус мазралмур «цIинцI» хIаласса мазрай гъалгъа тIий бур.

23.Ци дахчилай дур хIакьи­ну Дагъусттаннахун, цил аьнтIикIасса кIанттун ва надирсса миллатирттан лавхьхьуну, ххуйнугу, ххаллилнугу ялапар хъананшиврул?
ЗахIмат къабувну, кIулшивугу чанну дунура, чIярусса арцу ччай бур.
Багьу-бизулуву узданшиву дуруччин ччай бакъар.