[dropcap]М[/dropcap]айрал 26-нний Дагъусттаннал БакIчи Владимир Васильев хьунаавкьунни АьФ-лул Роспотребнадзорданул управлениялул каялувчинал хъиривчу Юлия Деминащал. Миннал ххал бивгьунни республикалийсса эпидемиялул тагьарданул масъала.
Юлия Деминал тIимунийну, республикалий коронавирусрацIунсса тагьар бигьасса дакъар, амма цIанасса ппурттуву му цалий дарцIуну дур: чан хъанай бур азар цIуну лархъми (сайки 9-лаксса). ЦIубутIуй азар лархъми гьарза хъанай бия 24 %, ларгсса нюжмардий тIурча – 2,8 %. ЦIанасса ппурттуву азар дирми МахIачкъалаливнияр районнай гьарзану бусса бур. Цаппара муниципалитетирттай тагьар цалий дацIлай дур, гайминнуй тIурча, ттигу захIматнура личIлай дур.
Юлия Деминал бувсунни азарханардайсса тагьарданиятугу.
Мунил тIимунийну, гьарца азарханалий зий икIан аьркинну ур эпидемиолог, азарханардайсса низамрал ялув ацIаву дулланшиврул. Республикалий зий бур 9 лаборатория. ЦIана бувкIун бур Ставрополлал противочум институтрал эпидемиялийн къаршисса бригада. Миннал буллантIий бур методикалийнусса кумаг, цанчирча духтуртурайнгу нигьачIаву диллай дуну тIий.
Юлия Деминал мукунма кIицI лавгунни нигьачIаву личIлай душиву авиарейсру гьарза даврийнугу: «ЦIана Москавлия ца кьини дур 7 рейс. Аэропортрал пландалий бур июньдалул 1-нния махъ ца кьини 16 рейс дуллан. Жул тавакъюри цалсса рейсру гьарза къадуван», — кунни ванил.
Владимир Васильевлул бакIрайн лавсунни Роспотребнадзорданул тIалавшиннарду хIисавравун ларсун зун, къуццу тIун.
