Битияра автобусру занай!

[dropcap]Л[/dropcap]ахьхьу-цархьхьу кунма дакIний бур жува Ма­хIачкъалалив цIусса автобусру «Нефазру» ягу, халкьуннаву учайсса куццуй, «Метанну» бучIаврия ххари хъанай бивкIсса куц.

Багьагу личIину хъунмасса бакъахьувкун, ми агьалинангу ччяни ххира хьуна, машгьур хьуна. Хаснува МахIачкъалалия Каспийскалийн ва махъунмай пассажир ххила­ххисса «Сотка». Кулпатирттаву кIия-шама студент уминнангу, гьар кьини МахIачкъалалив лага-бучIайминнангу къулайсса маршрут дия. КIирагу маршрут – Мах\ачкъалалив шагьрулувух­сса 44-мур ва МахIачкъалалия Каспийскаливсса 100-мур, Редукторный посёлокрай зузи­сса жунгу къулайсса дия, мудан бу­ххан, щябикIан къашай­сса маршруткалувунияр, хIатта автобус хIаллихсса бущилий нанисса кунма бизларчагу.

Утти вай автобусру къазанан­тIиссар тIисса хавар жун кьурчIи бивзунни. Цалчин, 130-ксса щупир даву дакъа личIантIий ур. КIилчин, баласса пандемия сававну, зурдардий зун къабюхълай, ахIвал кIюла бувкминнангу кьювкьусса автобусрува ччиссар. Автотранспортрал кIилчинмур предприятиялул (ва дур «Нефазирттал» заллугу) баян бунни автобусру букьан бан багьлай бушиврул сававгу хьхьичIрасса шиннардий салкьи хьусса бурж бушиву ва му бурж лахъансса цIакь цачIава бакъашиву. 200 миллион бусса бур автопаркрал бурж. Ва идаралул профкомрал председатель К. НухIовлул автопарк ххассал буван кабакьу бувара тIисса чагъарду гьан бувну бур Владимир Путиннуйн ва Генпрокурор Игорь Красновлуйн.

Дахьва шагьрулул жяматий­сса транспортрайн вардиш хьу­сса агьлу цIуницIа миннуя махIрум хьун къабитансса хIарачат буван­ссар тIисса умуд бур Транспортрал министерствалийн. Ци байссарив бувну, битияра автобусру занай. МахIачкъалаллал ца къирагърая Каспийскаллал къирагърайн бияннин агьали ххилаххисса автобусирттайн хIазран къаучайхьунссар «халкьуннал автобусру» куну. Мюрщи­сса оьрчIащалсса коляскардащал ниттихъаща аьркиннийн лага-бучIан шайсса, мукунма коляскардайсса муша­къатминнаща шагьрулувун бу­ккан шайсса ца ва транспорт дур МахIачкъалалив ва Каспийскалий. ДикIан аьркинссар шагьрурдай ахIвал кIюламиннан къулайсса социал транспортгу.

П. Рамазанова