[dropcap]Ч[/dropcap]ан бакъар Москавуллал клиникарттай COVID-19 цIуцIав­рийн къаршину бавцIусса ватанлувталгу. Миннавасса ца ур ГьунчIукьатIрал шяраватусса Аьбдуллаев АьбдурахIим МахIам­мадлул арс,

медициналул элмурдал кандидат, лавайсса категориялул хIакин-хирург.

---

Зулайхат Тахакьаева
АьбдурахIим увну ур 1972 шинал. 1996 шинал къуртал бувну бур Дагъусттаннал паччахIлугърал медициналул академия. Ординатура був­ккуну бур Москавуллал 40-мур ГКБ-лул гьанулий. 2001 шинал къуртал бувну бур аспирантура, дурурччуну дур «Диагностика, лечение и профилактика острого панкреатита гастродуоденоульцерозного генеза» темалун хас дурсса диссертация.

ЗахIматрал ххуллу байбивхьуну бур уссурвал Бахрушинхъал цIанийсса клиникалий. Муния махъ зий айивхьуну ур Москавуллал 40-мур ГКБ-лий. 2005 шиная хIакьинусса кьининин зий ур уссурвал Бахрушинхъал цIанийсса ГКБ-лий. АрхIала дарсругу дихьлай ур Москавуллал университетраву, хIакьину ва ур университетрал патологиялул ва морфологиялул кафедралул доцентну.

АьбдурахIим буслай ур цинявппа хIакинтал хIадур бувну бивкIшиву коронавирусрал инфекция кIул дуллан, хъин дуллан ва му ппив хьун къаритлан.
— Даву захIматсса дур, къулагъас чан дан багьлай ба­къар, — буслай ур АьбдурахIим. — Зий буру ацIния кIира ссятрай. «Щюллимур  зоналия» буккайхту,  СИЗ-ругу ларххун,  бухлай буру «ятIулмур зоналийн». Микку дайдихьлай дур агьаммур даву: цIусса къашайшалт кьамул бан ва уттубивхьусса къашайшалтрал ялув бацIан. Къашайшалтрал  дянив бур жагьилссагу, бугьарассагу, цайми къашайшивурттащал коронавирусралмур цIуцIавугу дусса.

Чансса ба­къар лапва захIматсса тагьарданийсса къашайшалтгу. Цимилвагу багьунни къашайшалт реанимациялул отделениялий утту­бишин бан. Медициналул зузалтран захIматну бур чIярусса ссятурдий  СИЗ-ирдаву, маскардаву ва респиратордаву зун, занан. ХIарачат буллай буру ряхра ссятрай цал бигьалаглан. «ЯтIул зоналува» буккайхту, СИЗ-ру ли­кканнин ва лирккун махъ, кIийлла дезинфекция дайссар жул. Амма, гьарца дезинфекция дуллалийни, жу ми заралсса затурдия ссихI ласласиссару, мунийнугу даврин  захIматшиву хъанай дур.

Москавлив медициналул зузалтрах ва миннал кулпатирттах хъуннасса аякьа дур. Дежурствардал дянив жу ялапар хъанай буру шагьрулул отеллаву, жула кулпатравуцириннайн цIуцIаву къалахъаншиврул. Жун кьинилун шамийлла дукралул щаллушиннагу дуссар. Ттул хъунмасса тава­къюри инсантурахь – бурувччуну бикIира. ЦIуллушиву чIа тIий ура цинявннан! – тIий ур жула дагъусттанлув, лаккучу.

Вания махъ АьбдурахIим цувагу къашавай хьунни. Къашавай унагу, ва, телефондалувух консультацияртту дуллай, инсантуран кумагру буллалисса акъавцIунни. Утти АьбдурахIим, хъин хьуну, цIунилгу зана хьунни коронавирусращал талатисса хIакинтурал кьюкьлувун. ТIайлабацIу баннав вин, АьбдурахIим, гьарцагу давриву, Аллагьнал цалва буруччиннав зу му азардания.