Жижара

Ина жул дакIурдиву личIантIиссара

ЩинчIав кIулну къабикIай ца зума хIала-ккала дурхсса, гамур зума дардирдал дурцIусса дунияллийн цу учIантIиссарив, цу яла гьантIиссарив.

 Лакрал кказитрал ца бусравсса бутIану бивкIсса инсан, жул КIямашрал шяравату­сса Загьрани Аьбдуллаева оьрмулул чагъираву дунияллияту лавгунни.


Ва бия хъинну цила шяравалугу, шяраваллил агьлугу ххира­сса, цинявннанмагу бусрав­сса, бусайсса мукъуйгу цIу бусса, дайсса давривугу усттарсса, хъуниминнал хIурмат бусса ххаллил­сса инсан. Хар-хавар бакъасса ванил бивкIулул жу циняв ккиз лаган бувну буру, уссуявав цина муксса ххирасса, уссинъявав цуппа ххирасса, муксса анаварну цанначIан ца, цаннал хъирив ца дунияллия лавгсса тIий.

Загьранил бивкIулул кьурчIи­шиву кIидачIлай, жижара буллай буру ласнахь, ласнауссихь, уссил кулпатрахь, ссурахъаврахь, цинявппагу гъан-маччанахь, кьунияхъайсса шиннардий архIал зий бивкIсса «Илчилул» зузалтрахь.

Хъунмасса барчаллагь учин ччай буру гьарца чIумал, гьар­ца ишираву, аьркинний чIарав бацIайсса чIаххуврайсса ГьунчIукьатIрал жяматрахь, шя­раваллил администрациялухь, жагьи-жугьултрахь, хъами-душ­варахь, шаймур буллай, хьхьу-кьини къаувкуну, Загьранил ялув бавцIуну бивкIсса Лакрал райондалул азарханалул хIакинтурахь, дакIнихтунусса къайгъулийну ваних буруглай бивкIсса медсест­рахъахь – Маржанатлухь ва Аль­би­нахь.

Загьранил бунагьирттал аьпа баннав, алжан нясив баннав! Ванил аьпа жучIа абадну личIантIиссар.
КIямашрал жямат


Цан анавар бувкракьай, Загьраний?

ДакIнин хъинну ччимурвагу биттур буван къабюхълахъисса чIун дур жулла ялун дуркIун. ЦIуцIиначIан гьан бюхълай бакъар, ахиратравун лавгсса инсаннал къушлийн жижара бан гьан бюхълай ба­къар. Цукунссаривсса, чIивисса, бувагу къачIалачIисса микробрал бур инсантал, чIиникIрал ур­тту кунма, кьатI буллай. Вана ттучIан зунттавунгу бувкIунни, «Илчи» кказитрайхчIин, хъинну кьурчIисса хавар. Ттул даврил уртакь, бювхъусса чур­ххал заллу, симандалува тачIав пиш чан къашайсса хъамитайпа бур ахиратрал хьуну. Мунин цIагу ду­ссия ца ххуйсса, Загьрани тIисса. Тарив, аьпабивул, Загьранил куну бивкIссар тIун бикIайва «На «Илчилун» щарну буссара» тIисса махъру. Ва ца калималийнугума чIалай бия ва хъярч-махсара буван кIулсса зунттал душ бушиву.
Цибанссар, Аллагьнал чичрулия лихъан жущава тачIав къашай. Заннал язи бувгьусса кIанай хьуссар жула Загьранил кIанугу. Му кIанугу ванил авурну чIюлу бантIиссар.

Нагу «Илчи» кказитрал
Ккуллал райондалийсса
корреспондент,
ХIажимурад ХIусайнов


Хъуннасса кьурчIишивугу кIидачIлай, жижара буллай буру щалагу «Илчи» кказитрал коллективрахь, вайннал ххаллилсса зузала, миллатгу, мазгу ххирасса хIакьсса патриот

Загьрани Аьбдуллаева
аьпалул шаврийн бувну. Алжаннул ххари баннав, гьав нурданул дуцIиннав. Махъминнал оьрмурдай барачат бишиннав.
Ккурккуллал жяматрал цIания Даниял Магьдиев


Хъуннасса кьурчIишивугу кIидачIлай, жижара буллай буру Ширванинахь, ванал кулпат

Загьрани
аьпалухьхьун лагаврийн бувну. Мукунна къумашиву кIидачIлай буру ванил ласнауссу Ссапардухьгу.
Имандалий лавгун лякъиннав, рухI алжаннул ххари даннав, махънахьхьун цIуллушиву дулуннав.
ЧIятусса Загьиди Аьбидовлул кулпат


ИСМЯИЛЛУЛ АРС ОЬМАРИ ИСМЯИЛОВ

Май зурул 29-нний жуятува личIи хьунни ххаллилсса лаккучу, бусравсса чIарачу, Исмяиллул арс Оьмари Исмяилов.

Увну ур Оьмари 1924-ку шинал ЧIарттал шяраву. Школагу къуртал бувну, увххун ур Гъумучиял педучилищалувун. Му къуртал бувну махъ зий ивкIун ур ЧIарттал школалий. Цалчинсса шиннардийва Оьмарил ккаккан бувну бур цува лавайсса даражалул учитель ва тарбиячи ушиву. Оьмарил хъунмасса захIмат бивхьуссар халкьуннан кIулшивуртту дулаврил аралуву. 1943-ку шинал ва ивтссар школалул директорну, 1949-ку шинал – Лакрал райондалул халкьуннан кIулшивуртту дулаврил отделданул хъунаману, 1951-ку шинал – Лакрал райондалул партиялул комитетрал кIилчинма секретарьну.

Ва къуллугърай зий кIира шин дайхту, Оьмари ивтссар Лакрал райондалул советрал исполкомрал председательну. 1953-ку шинал ва увххун ур Дагъусттаннал педагогический институтрал тарихрал факультетрайн. Мира шиннардий къуртал бувну бур лавай­сса даражалул партиялул школа. 1955-ку шинал Оьмари, шяравун зана хьуну, ЧIарттал школалул директорну зун ивкIун ур.

Халкьуннан кIулшивуртту дулаврил аралуву дурсса лайкьшивуртту хIисавравун ларсун, Оьмарин дуллуну дур Дагъусттаннал, РСФСР-нул лайкь хьусса учительнал бусравсса цIарду.
Пенсиялийн увккун махъгу Оьмари цащава шайсса кумаг буллан икIайва учительтурал коллективрангу, шяраваллил жяматрангу. Ванал сийгу, хIурматгу хъунмая жяматрал дянивгу, райондалийгу. Шяравугу, лагма щархъайгу «Оьмари-мямма» кунуя учайсса ванайн.
Оьмари-мямма аьпалул шаврил кьурчIишиву кIидачIлай, жижара буллай буру оьрчIахь, уссур-ссуннахь, махъсса гъан-маччанахь. Имандалий лавгун лякъиннав, рухI алжаннул ххари даннав. Махъсса цинявннал оьр­мурдай барачат бишиннав.

ЧIарттал шяраваллил
ва лагма щархъал жямат


Дажал душ Амирова Нуранижат

Вай гьантрай мукьцIал хьун­тIиссар Рамазан зурул байбихьулий жуятува личIи хьусса КIулушацIрал щяраватусса Дажал ва ПатIиматлул душ Амирова Нуранижатлул.

Нуранижат бувну бур КIулу­шацIрал шяраву 1941 шинал. Ппугу ччяни ивкIуну, ва хъунма бувну бур ниттил, ПатIиматлул. Школа къуртал бувния мукьах зий бивкIун бур колхозраву, хъу-лухччинулсса, гъаттаралсса буллай. Цила шяраватусса Амиров Исмяиллущал ташу бувну, вайннал дянив хьуну бур 5 оьрчI – 2 арс, 3 душ. Вайгу бур, ва цуппа кунма, захIмат ххирасса, чIя­вучин бусравсса.
Нуранижат бия дакI-аьмал хъинсса, гьарцаннащал хIал бавкьусса инсан. Ва ххирая цинявппа гъан-маччанан, ласнал ля­хъиндалун.
Нуранижат аьпалул шаврил кьурчIишиву кIидачIлай, жижара буллай буру ванил арсурваврахь – Дажахь, Ибрагьиннухь, душваврахь – Умахь, Маринахь, Ленахь, махъсса гъан-маччанахь.
Имандалий лавгун лякъиннав, алжаннул ххари баннав, ванин аьзизну бивкIминнал оьр­мурду лахъи баннав.

Жул аьзизсса ссурахъуй, ина жул дакIурдиву оьрмулухун ли­чIантIиссара.
 Вил ссурахъаврал цIания ТIутIи


Вай гьантрай аьпалухьхьун лавгунни ххаллилсса лаккучу, бу­сса оьрмулий личIи-личIисса жаваблувсса къуллугъирттай зий ивкIсса, ЧIарттал шяравасса

Исмяиллул арс Оьмари Исмяилов.
КьурчIишиву кIидачIлай, жижара буллай буру арснахь Исмяиллухь, душваврахь, щалагу ЧIарттал жяматрахь. Имандалий лавгун лякъиннав, рухI хъинний дишиннав.
Ккурккуллал жяматрал цIания Даниял Магьдиев