[dropcap]И[/dropcap]юньдалул 10-нний МахIачкъалаллал аэропортрай Дагъусттаннал БакIчи Владимир Васильевлул хьунабавкьунни Москавлия жулла республикалийн кумагран бувкIсса духтуртал.
Миннал бакIчину ур Москав шагьрулул 40-мур клиникалул азарханалул (Коммунаркалийсса медициналул центр) хъунама хIакин Денис Проценко.
Республикалийн бувкIсса пишакартуравух бур давуртту канилух дурксса инфекционистътал, рентгенолог, терапевт ва анестезиолог.
Владимир Васильевлул хъамаллуращал цачIу ххалдиргьунни Республикалийсса коронавирусрал эпидемиялул тагьар.
Махъ журналистътуращалсса хьунабакьаврий Денис Проценкол бувсунни цIана бувкIсса пишакартал хьунабакьинтIий бушиву шикку ттинин зий бивкIсса хIакинтуращал ва кьамул дувантIий бушиву миннал дурмур. Мунал тIимунийну, цалсса бакъар коронавирусрал инфекция хъин дайсса, вирус духлаган дансса хасъсса дарув, муних лаглай бур. Мунал жавабру дуллунни журналистътурал буллусса цаймигу суаллахьхьун. Проценкол тIимунийну, цIуну бувкIсса духтуртурал февральданул 29-нния шинмай хъин бувну бур 3000-нния ливчусса къашайшалт.
Владимир Васильевлул, миннахь барчаллагьгу куну, кIицI бунни хIакинтал республикалийн бучIаврил хъуннасса мяъна душиву.
«Зух ялугьлай бур жул духтуртал, миннал зун ккаккан буванссар захIматсса тагьарданийсса къашайшалт, лаласунссар зул маслихIатру, лахьхьинссар зуяту хьхьичIунсса технологияртту. Зун барчаллагь. Жу зунгу кумаг булланну», — кунни Владимир Васильевлул.
ХIасан Аьдилов
