[dropcap]И[/dropcap]юльданул 1-нний хьунтIиссар Аьрасатнал Федерациялул Конституциялийнсса дахханашивурттахлу чIурду булаву.

Да­гъусттаннай му цукун дувантIиссарив бувсунни ДР-лул БувчIавурттал комиссиялул председатель МахIаммад Дибировлул.

---

— Дагъусттаннай циксса бур сияхIрайн лавсун чIурду булайми?
— 2020 шинал январданул 1-ннийсса ккалданий республикалий сияхIрайн лавсун ур 1 млн. 697 азаллий 825 чIурду булайма.

— Республикалий щил дувайссар Щалагу Аьрасатнал чIурду булаврил кьинилийнсса хIадуршин ва цурда чIурду булаву?
— Вай давуртту дувайссар ДР-лул БувчIавурттал комиссиялул, территориал бувчIавурттал 54 комиссиялул ва участокрал бувчIавурттал 1915 комиссиялул.

— Цими инсан гьуртту хъанай ур бувчIавурттал комиссиярттал давурттавух?
— Республикалий бувчIа­вурттал комиссиярттал давур­тту дузал дуллантIиссар комиссиялул 12 азаллий 758 членнал.

— Циксса бюллетенну хIадур бантIиссар?
— 1 миллион 697 азаллий 825 бюллетен, миннувату 153 азаллий 652 бюллетен – бувчIавурттал лази-лакьилунсса комплексирданни (для комплексов обработки избирательных бюллетеней).

— ЧIурду булаврил участокру цинярдагу циксса дикIантIиссар?
— Республикалий тIи­тIин­тIиссар 1 азаллий 9156 учас­ток. Мукунма чIурду булунсса кIанттурду хIадур бувантIиссар участокирттал кьатIувгу.

— ЧIурду буллансса участокирттай цIанасса ппурттуву цукунсса хIадуршин дур?
— Июньдалул 8-ку кьини участокру дузалну дур гьарца аьркинлугърал. Микку гьарца кьини дуллантIиссар дезинфекцияртту, бувчIавурттал комиссиярттал члентурал, чIурду булун бувкIминнал, ялув бацIаву дуллалиминнал лях бикIантIиссар санитар манзил, ххал дуллантIиссар чурххал кIиришиву.

— Чув ва та хьунтIиссар чIун дияннинсса (досрочное) чIурду булаву ва му цуксса хIаллай лахъи лагантIиссар?
— Му хьунтIиссар цаппара кIанттурдайсса бувчIавурттал участокирттай: Аьхьхьахъиял, Бущихъиял, Щаржавуллал, Гумбетуллал, Гъуниннал, Рутуллал, УнцIукIуллал, ЦIумадиял ва Шамиллул районнай – 106 учас­токрай, чIурду булаврил кьини дучIан 15 гьантлул хьхьичI.

— Цукунсса журалий­сса дикIантIиссар чIурду булаву?
— ЧIурду буллай байби­шин­тIиссар чIурду булай кьини дучIан 6 гьантлул хьхьичIва, июньдалул 25-нния 30-ннийнин, мукунма чIурду булай кьинигу – июльданул 1-нний. Му мукун бувссар участокирттай чIявусса инсантал салкьи къахъананшиврул.
— Цукун буручлантIиссар азар лахъаврища чIур­ду булун бувкIми, був­чIавурттал комиссияр­ттал члентал, ялув бацIаву дуллалими, СМИ-лул вакилтал, поли­цалул зузалт?
— Миннан цинявннан ду­лунтIиссар маскарду, катIри, санитайзерду, дуллантIиссар дезинфекцияртту.

— ЛаслантIиссарив избиркомирттал члентураща коронавирусрал тест?
— БувчIавурттал коми­ссиярттал циняв члентураща ласунтIиссар тест.

— Къашавайссаннал чIур­ду цукунни булун­тIисса?
— Къашайшалтрал чIурду булунтIиссар циняв санитар кьяйдарду дурурччуну, миннансса кIанттурду хIадур бувантIиссар.

— Та кIул хьунтIиссар чIурду булаврил хIа­силлу?
— Республикалий бувчIа­вурттал хIасиллу дувантIиссар июльданул 3-ннийнин. Июльданул 7-ннияр чIал дакъа чIурду булаврил аьмсса хIасиллу тас­ттикь дувантIиссар АьФ-лул ЦИК-рал.

ХIадур бувссар
ХIасан Аьдиловлул