[dropcap]Х[/dropcap]Iакьину коронавирусрал циняв къатра-къатравун лякIан бувну, жуламур гужгу биял къавхьуну, иш оьнийн багьарча, жула ялун кумагращал бучIанми «Анаварсса кумаграл» пишакартал бур.
Вайгур жула хIакьинусса виричусса хIакинтурал кьюкьлул бакI дургьуми.
Залму АьбдурахIманова
— Цуксса захIматнугу, хьхьунил ссят 2-ннийгу, 3-ннийгу, кув чIумал жува чун наниссарив къакIулну, кув чIумал цIансса подъездирттавух, лифт дунигу, дакъани занай бивкIнугу, коронавирусрал мугьалттул бугьан хьхьичI жу неъматрай зий бивкIун буру, — тIий бур ттущалсса ихтилатраву 40-хъул шинну медициналун хас дурсса МахIачкъалаллал «Анаварсса кумаграл» фельдшер Земфира Мирзаева.
[dropcap]В[/dropcap]анил ппугу, Уриннал шяраватусса Аьлиев Камил, Лакрал райондалий чIявучин ххуйну кIулсса, райондалул азарханалул хъунама хIакиннугу, чIярусса шиннардий хирургнугу зий ивкIсса, щалла райондалийгу бусраврай цала цIа кьадиртсса адимина ур. Ккурккуллал шяраватусса ниттил Майсаратлулгу 40-хъул шинну дурссар Уриннал школалий математикалул дарсру дихьлай. Ванил чулинмайсса хIурматгу жяматраву хъунмассар.
1980 шинал медициналул училищагу къуртал бувну, КIамахъаллал шяраватусса Оьмар-ХIажинан щар хьуну махъ, Земфирал 20 шин дурссар КIамахъаллал ФАП-рай зий. МахIачкъалалив бивзния шинмай утти 21 шин хъанай дур Земфирал «Анаварсса кумаграй» зий.
— Мартрал ахирданий, жучIара дахьра азар ххарахлахисса чIумал, жул даврийсса чIявусса зузалт къашавай хьуна. На навагу ацIва гьантта бував, чурххал кIиришиву лархъун, тай гьантрай шаппа дарув-дарманну буллай. Жул гужругу, каширдугу, азарханардай кIанттурдугу биял къахъанан бивкIукун, станциялийва хIакин-консультантътал щябивтун, онлайн-режимрай къашайшалтращал дахIаву дурну, шаппа буна миннал цала ци дарув, ци чаранну ишла бантIиссарив бусласисса давугу щурущи дурну дуссия хьхьичI гьантрай. Къашайшалтрив нех дирхьуну най бия, жун азарханардал хIаятирттаву къашайшалт кьамул баннин ссятурдий кьюкьрайгума бацIан багьайва. Ттулмур бригада ца ттуяту ва на бувцуну заназисса щупирнаятур сакин бувну бусса. Жул фельдшертурая сакин бувсса бригадарттаву хIакинтал бакъассар. Гьакссагу къабигьану бур, хаснува цIана.
[dropcap]Я[/dropcap]ла дакIнивун кьувтIусса ишру цукунсса бия учирча, кIицI бавияв, азарханардай къашайшалт уттубишин бансса кIанттурду бакъану, жухьва цIими чIа тIисса къашайшалтран ци банссарив къакIулну ливчIсса ишру бия, — тIий бур Земфира
Ванил душ Султанатгу терапевтну зий бусса бур цIана МахIачкъалаллал 1-мур азарханалул «ятIулмур зоналий». Ванилгу 20 гьантта хьуну бур цила оьрчIру ххал къавхьуну, гивува зий. Яла 10 гьантлийсса шаппай бигьалагангу бувкIун, цIунилгу къашайшалтрачIан зана хьунтIиссар вагу. Ва вайннал даврил низамри.
Вана укун, душгу, нинугу, цанния цагу ятну, хIакьинусса вирттаврал цасса кьюкьлувух агьалинал оьрмурду ххассал буллай бур.
ЦIуллушиву дулуннав зухьхьун! Аллагьнал ябаннав зу жун!
