[dropcap]М[/dropcap]айрал 20-нний МахIачкъалалив хьунни Дагъусттаннал парламентрал 46-мур сессия. Му бачин бувну ия ДР-лул Халкьуннал Мажлисрал Председатель Хизри Шихсяидов.

БакIрай мунал бувсунни ва нюжмардий хьу ну диркIшиву Аьрасатнал Президент Владимир Путиннул ВКС-рал низамрайсса батIаву, Дагъусттаннай­сса эпидемиялул тагьарданун хасну. Бувсунни му батIаврил мурадрая, бувсунни ва сессиялий ххал дигьинтIишиву цалва цивппа даврил дузал буллалиминнан кумаг­рансса, хъузалтран кумагран­сса, чIиримур ва дянивмур бизнесран кумагрансса ва цаймигу масъаларттал хIакъиравусса законнал проектру.
Сессиялий махъ лавхъунни ДР-лул ХIукуматрал Председатель Артем Здуновлул. Мунал бувсунни коронавирусрал инфекциялущалсса талатаврил Оператив штабрал дурсса давурттая, республикалийсса коронавирусрал инфекциялул тагьардания ва мунищал­сса талатаврия. Бувсунни республикалийсса экономикалул тагьарданиягу.
Яла ванал жавабру дуллунни депутатътурал суаллахьхьун.

Сессиялий ихтилат бунни мукунма ДР-лул ХIукуматрал Председательнал цалчинма хъиривчу ХIажимахIаммад ХIусайновлул. Ванал бувсунни циксса арцу харж дурссарив коронавирусрал инфекциялущалсса талатаврин хасну, циксса даруртту, кислородрал аппаратру, маскарду ва цаймигу затру ларсъссарив, циксса арцу дуллуссарив коронавирусрал инфекциялул къашавайсса инсантуращал зузисса духтуртурангу.
Муния махъ депутатътурал кьамул дунни цаппара законнал проектру.