Арснах ялугьлайнна диркIуну дур

Дяъвилийн гьаннин хьхьичI рирщусса сурат:
АхIмади, ванал кулпат Аминат,
арс Муса (АхIмад АхIмадовлул ппу), душ Хамисат

Хъунмасса Буттал кIанттул цIанийсса дяъви байбивхьусса чIумал Ватан душманная дуруччин лавгун, зана хьун кьисмат къавхьусса цала ттаттаясса, буттал ппу АхIмадов АхIмадиясса

 хавар ттухь бувсунни жуна цинявннан ххирасса Дагъусттаннал халкьуннал артист АхIмад АхIмадовлул. АхIмадлун цаннагу ва тта­ттал цIа дуллуну дур.


Андриана Аьбдуллаева
Хъювхъиял шяравасса АхI­мадов АхIмадил дяъви байбивхьусса чIумал бронь диркIун дур. Ва му чIумал ТIаннул ЦIувкIуллал школалул директорну зий ивкIун ур. Амма Ватандалийн душман ххявххукун, хушрай дяъвилийн лавгун ур. Гьарица чулуха­сса кIулшивуртту дусса, дуркку­сса, бакI-чурххалгу ххуйсса адамина ивкIун ур. АхIмадил цалчинсса кутIасса чагъар бувкIун бур Бакуя. «Бакуйн увкIун, шичча най ура фронтрайн. Утти ххал бара зу на немец ци зи байрив. ХхартI банна­хха ияйхту. Зу пикри мабару, на зана хьунна», — чичлай ур АхIмади.

Цамур чагъарунний ва ур буруккинттарайсса ниттил дакI дан­мур буллай: «Ттул кьадру-кьимат чанну хьусса нинуй. Ина дакI дарцIуну дикIу вила кьадру ттун хъамакъабитантIишиврий. На зана хьунтIиссара хIакьину куна. На аьрайн лавгсса ивчIан ххайрагу дакъарав. Ттул пикригу, кIулшигу, нагу цIана вин ккаккарча, чаннаннил хха хьуну нанисса кьюкьлуву най, дунияллий цичIар хьхьичI къадацIанссар тIисса пикри багьантIиссар вин. Ттун баюнни ина, кIучIниннай хьуну, къумалаглай дур тIий.

АхIмадил нину Мардижа

[dropcap]М[/dropcap]у яла тIааьн дакъамур тIул дур ина лархьхьусса. Ина мукун зурча, на учIаннин ци хIалданийн дагьантIиссарав ттун кIулли. Уттива яру мурчIи бувну, командир хьуну увкIукун, на кашлих ххал уллан ччай дурав? На цIана цичIав захIматшивруву акъара, ттуна ччикун, зунттавусса ав куна, ура. Ттул бакI цIун къабивкIунни, лякьа цIун къадиркIунни, ккарччив къадагьунни. Ина пахру ба, Буттал кIанттул цIанийсса дяъвилийн гьан ан на увну ивкIшиврий.

Ниттил АхIмадихьхьун ххуллухъиндаран дирхьуну диркIсса арцул кIапIикI

[dropcap]В[/dropcap]ил кьадру хIукуматрачIа лавай­ссар, на, ваксса увну, дяъвилийн гьан увну тIий. ЧIяруну ина ттунна за дуллай, дулун къахъанай макIра ккаккара, дукра канакийни дакIнийн агьайхьунссара», — чичлай ур АхIмади. Махъва-махъсса чагъар бувкIун бур 1942-ку шинал Телави тIисса гуржиял шагьрулия. Шикку АхIмади мюрщи командиртурал школалий дуклай ивкIун ур. Хъунмасса хIаллай ва ятIа-тIар бакъа акъахьушиврун ккаллину ивкIун ур. Дяъви къуртал хьуну шинну ларгун махъ кIул хьуну бур АхIмади нанисса эшелон немецнал ттупру бичлай ппив-ххив дуршиву.

АхIмади АхIмадов

Ванащал ивкIсса Аьйнуттин тIисса лаккучунал (часcа ивкIссарив дакIний бакъар – А.А.) ттупал ппив увсса АхIмадлул базурду бавтIун, шинельдануву бивхьуну, ца ламул лув ялтту чар­ттугу бивхьуну бувччуну бур. Вай гьарзат кIул хьуну бур ванащал ца полкраву ивкIсса Аьйнуттин шинну ларгун махъ Аьрасатнава Ла­ккуйн зана хьусса чIумал. Контузит хьуну ивкIсса Аьйнуттиннуща му ламу чув бивкIссаривгу бувчIин бан къавхьуну бур. Ванал дуллуну дур АхIмадил кулпатрахьхьун мунал жиплива ларсъсса гъаргъсса ссят, гьайчали хIисаврай ниттил дуллуну диркIсса арцул кIапIикI, партра-мачIари хьусса оьрчIал суратру ва шаппатусса чагъарду.

Дяъвилиясса шанмурцIу чагъарду

АхIмади Мардижал ца акъа акъа­сса арс ивкIун ур. «Ттул кюру бакъа читIуй», тIий, арснаха зума тIун дикIайсса диркIун дур мудан. ДирчIаннин хьхьичI буслан дикIайсса диркIун дур чIяруну ккаклакисса цара ца макI. АхIмади, дархIусса щавурдугу оьттул гъулургъуну, ца дазу-зума дакъасса кIяласса паммалул авлахърайх най, дадай тIий, цийна оьвтIий. Цурда дачайхту, арх уцлай, аьрщигу, ссавгу хIала дурхний акъа-къатIа шай тIий.

Мардижал цила ттуршра шинавун буххавайсса лахъи­сса оьрму бувтун бур. «Арс ув­ччусса кIану бакъасса ттун ва оьрмулул ци бай­ссар», тIийна диркIун дур. Аманат бувну бур цурда дирчIайхту, кIюрххилнин къариртун, гара кьини дуччияра куну. «ЧувчIав паракьат къархьу­сса арснал рухI ттух ялугьлай ду­ссар» тIий диркIун дур. ДиркIуну дур цурдагу бявкъусса январь зуруй маркIачIан чIумал. Дурччуну дур, цила аманат бувсса куццуй, гара кьини. Буллалисса марххалттанивух, лампалул чаннай.

АхIмади аьрайн лавгсса чIумал ванал кIива мюрщисса оьрчI бивкIун бур. Вайнная ххаллил­сса оьрчIру хьуну бур. Арс Муса, жула АхIмад АхIмадовлул ппу, ДР-лул лайкь хьусса экономистри. Душ Хамисат Мирзаева чIярусса шиннардий Дагъусттаннал университетраву дарс дихьлай бивкIссар. Ва химиялул элмурдал кандидатри. ЦIана 80-нния лирчусса шиннал оьрмулуву бур вай. Вайнналми оьрчIругу Ватандалухлу жан дуллусса тта­ттал цIа лайкьну дуручлачисса бур, жула АхIмадлуя тIайла хьуну.