ДР-лул ЗахIматрал ва социал иширттал министерствалул ххал бигьлай бур республикалул идарартту кризисрайн къарши­сса давуртту дузрайн дуккан дуллалисса иширттавух гьуртту шаврил масъала.

Зузисса идарарттай захIмат­рал тагьар къалияншиврул ва зузалт давурттал дузал баншиврул, Министерствалул ххал бигьлай бур укунсса масъалартту:
-давурттацIа хьун бюхъай­сса идарарттал зузалт чIумуйсса давурттал дузал баву (ца инсаннан зуруй 15793 къуруш 6 зуруйн биянцIа);
-давурттацIа хьун бюхъай­сса идарарттал зузалт жяматий­сса давурттал дузал баву, мира шартIру хIисавравун ларсун;
-давурттал дузал бувултран давурттацIа хьуминнан бачIи-кьачIину харжру лахъаву дуван (15793 къуруш ца инсаннан хIисавну, 3 зуруй).
— ялун ххи бувсса зузи кIан­ттурду дузал буван кумаг баву (ца зузи кIану дузал банну 100 азарда къуруш ккаккан дурну);
— давуртту дакъа ливчIминнан арцуйнусса кумаг баву, агарда ми зий бухьурча фрилинс­рал системалий, самозанятыйну сияхIрайнгу лавсун (ца зузи кIанттухлу 100 азарда къуруш ккаккан дурну).
ДР-лул ЗахIматрал министерствалул арцуйнусса кумаг буллалиссар давуртту дакъа­ссаксса инсантуран цалла давуртту дайдихьлай бухьурча, ца инсаннан 96 азарда къуруш хIисавну. Давуртту дакъа­ссаксса инсантуран, чIумуйсса давурттай бухьурча, кумаг хIисавну ккаккан дурну дур зуруй 3000 къурушгу.