Цуксса коронавирусрал азардания цаннагу нигь дунугу, инсантурал оьрмурду ххассал буллалисса кIяла хялатирттавусса вирттаврай – хIучI къакуну азарданун дяъви баян бувсса талаталтрай мяшгума хъанай бивкIра вай гьантрай. ХIакьину бусанну миннавасса цаппараннаяту.
ПатIимат Рамазанова
[dropcap]Ч[/dropcap]Iурттащиял шяраватусса Аьбдулмаликлул арс ХIусманов ХIусман зий ур Москавлив, Филатовлул цIанийсса № 15 шагьрулул азарханалул кьамул бай отделениялул хъунаману. Ва хIакьинусса кьини билаятрай яла хъунмур инфекционный госпиталь хъанай бур. ХIусман лараймур категориялул анестезиолог-реаниматолог ур. Ва гьантлун сайки 300 къашайшалал ялтту уккайсса ур. Сайки гьарманахь цIухху-бусу буван хIарачат бувара тIий ур, къашайшалт цала зуматусса калималух, вихшала дишин буллалисса мукъух мякьну буну.
Ва, Инстаграмрайгу, цалва сайтрайгу цалчинсса гьантрайва вирусрал къашай хьуминнан маслихIатру буллай, къазразанну ливчIсса, цукунсса дарурттая байбихьинтIиссарив къакIулсса инсантурал суаллахьхьун жавабру дуллай ия. КIу къабивзун, гьарманахьхьун телефондалувухгу жавабру дуллай ия, цува цуксса ухлай, багьтIатIал хъанай унугу. Москавлив цачIавасса къашайшалтгу хъин буллай, Дагъусттанная бикIу, цайми регионная бикIу, цайнма бувкминнал къайгъурдалссагу буллай ия. Буллайнувагу ур, архIала цинявннан учIи лякъинну.
[dropcap]Х[/dropcap]IасанхIусайннул душ Нажмуттинова Аьшура. Ва Читтурдал шяраватусса бур. Зий бур Н. Э. Бауманнул цIанийсса Москавуллал азарханалий.
— Коронавирусрал къашавайми чIявуми хъунмур никирал агьлу бур. Вайннал ялун биян гъан-маччанан къадагъа дур. Вайннал дакIурдиву ццахханну, ярунниву къумашиву дур. Скафандирттал журалийсса жул лаххиялух, респиратордах бурувгукун, нигь ххишала хъанахъисса вай буссар «Жу шичча шаппай зана хьунавав?» тIисса суаллу буллай. ЗахIматсса тагьар дур.
Вай вирусрал бас буллалисса къари-къужри чIалай, на цал уттигу зухь миннат буллай бура: «Жагьилссару, жул иммунитет цIакьссар» къакуну, зуйва аьтIий бакъахьурча, зула бава- ттаттахъал пикри бувара, вай буруччара. Жу жущава шаймур буванну жучIанма багьми, хъин бувну, ччяни шаппа-шаппай тIайла буккан, — тIий бур Аьшура, коронавирусрал жагьилми, бугьарами личIи къабувайшиврийгу чIурчIав дуллай.
[dropcap]С[/dropcap]улайманнул душ Рамазанова Наталья. Ва 1-мур ЦIувкIратуссар. 2007 шинал ванил къуртал бувну бур Дагъусттаннал мединститут. Зий бур Редукторныйливсса № 1 азарханалий. Ва акушер-гинеколог бур. Азарханалия коронавирусрал къашавайми хъин буллалисса госпиталь бувайхту, Натальягу шикку зий бур, мюрщисса оьрчIругу шаппа цихва мякьну ялугьи бувну. «ЯтIул зоналувун» нанини нигь къадикIайрив куну цIувххукун, Наталья бур нигьал пикри банссавагу мажал къабикIай, так къашайшалт бивкIулул ххутIаща ххассал хьуния тIун бикIара тIий. ОьрчIащал, ичIувацириннащал телефондалувух гъалгъа буваврийну гьашиву дуван багьай, оьрчIангу, мюрщисса бухьурчагу, бувчIлай бур цув даврий бикIан аьркиншиву тIий бур.
[dropcap]М[/dropcap]ахIаммадлул душ Аминова Аьйшат. Ва 1-мур ЦIувкIратуссар. Зий бур Каспийскалив централ азарханалул хIакин-неврологну.
Ва азарханалийгу коронавирусрал инжитми хъин буллай бур. Нигь дусса кIанттай зун лага-къалагаврил хIакъираву ва бур нигь ду-дакъашиву къабикIайссар, хIакин цува тIалавний зун хIадурну икIан аьркинссар тIий. «ХIакиннал пиша язи бугьайнива кIулну бикIан аьркинссар цува цукунсса давриха зунтIиссарив. Мудангу инсантуран кумаг буллан, ссавурданий ва дакIцIуцIаврий къашайшалт хъин буллансса мурад бакъахьурча, медициналуву зун къашайссар. ХIакиннал пиша язи бувгьуну бухьувкун, зун аьркинссару давриву дакI дирхьуну, марцIну, цIими буну, дакIнихтуну», — тIий бур Аьйшат.
Ялун ххигу буванна, циняв хIакинтал, ца зумату кунма, цая чичлан ссан аьркинни, цив цичIар личIисса дуллай бакъару, цалла давуру дуллалисса тIий бивкIшиву. ЦIуллушиву дулуннав зухьхьунгу, кIяла хялатирттавусса уттизаманнул вирттал! Зу кунма, хьхьу-кьини дакъа вирусращал талатисса махъсса цинявппагу медициналул зузалтрахьхьунгу. Зул хIарачат барачат хьуну, ччяни дирчIаннав вирус! Зугу ичIаллих мякьну бухьунссару. Жугу – рахIатсса оьрмулух. Жулва цакуцсса мурадру бартлаганнав!
