Зул кIунттихьри жул цIуллушиву

Зул кIунттихьри жул цIуллушиву

Карин Каммаев

ЦIуссаккуллал шяравасса АьвдурахIманнул арс Карин Каммаев хIакьину коронавирусрал инфекциялущал талай хьхьичI ххуттай бавцIусса хIакинтуравасса ца ур.


Андриана Аьбдуллаева
2012-ку шинал ЦIуссалакрал шяраву школагу къуртал бувну Карин увххун ур дуклан Н.И.Пироговлул цIанийсса РНИМУ-лувун ( Российский национальный исследовательский медицинский университет). Институт къуртал байхту ув­ххун ур «Хирургиялул эндоскопия» пиша лахьхьинсса ординатуралувун Н.В.Склифосовскийл цIанийсса анаварсса кумаграл элмулул ва ахттаршиннарал институтравун. Коронавирусрал инфекция ппив шаврицIун бавхIуну шиккугу чIяруми отделениярттай коронавирусрал къашавайми хъин буллай бур. Карингу укунсса инсантуран кумаг баву цIана цала агьаммур буржну чIалай га цIана хушрай увкIун ур ва отделениялий зун. Утти вагу цайми цала коллега­хъащал «ятIул зоналий» зий, къашайшалт нигьачIисса азаруннища хассал буллай ур.

Карин оьвчаву дуллай ур цала ватанлувтурайн бурувччуну бикIияра, цукунчIав ва азаруннил чулухуннай баччибакъашиву мадару тIий. ЛяличIинува личIлулну бикIияра тIий ур ва гьутрурдал ва бронхирттал къашайшиву, сахарный диабет думиннахь, мукунма иммунитет хьхьарасса думиннахь.

-ХIакьину шаппа бацIаврийну зу мюхчан буллалиссару ца зуласса бакъассагу, кьатIув був­ккун зуяра азар лахъан бю­хъай­сса инсантуралссагу. Му ба­къассагу куклу дуллали­ссару жулмур давугу. Так укун су­кку тIурчанни жущара ва азар дух дан бюхъантIисса ,-тIий ур Карин. Жугу цинявппагу жула агьалинал цIания барчаллагь тIий буру Кариннухьгу, ва кунма нигьачIисса азаруннищал талай агьалинал цIуллу-сагъшиврул къаралданий бавцIусса цинявппа хIакинтурахьгу.

Читайте также: