Аьрасатнал дакьаврил фондрал кабакьаврийну ва «Зеленое яблоко» ттучаннал сетьрал гьурттушиндарайну,
Дагъусттаннал дакьаврил фондрал барча бунни Каспийск шагьрулул Хъун дяъвилул ветерантал ва концлагерьдал дуснакьлувтал Ххувшаврил байрандалущал.
Зулайхат Тахакьаева
[dropcap]Б[/dropcap]юххансса мукъурттий барча бунни Дагъусттаннал дакьаврил фондрал хъунама АьвдулхIамид Давудовлул ветерантал. Барчаллагь увкунни чумартшиврухлу, виричушиврухлу, кIицI лавгунни вайннал къучагъшиврул кьимат абадлий личIантIишиву, никирая никирайн биллай.
— ДухIан къашайсса захIматшивурттал лахIан къабувну, оьттул кIунтIлий хIайп къакуну ларсъссар зу Ххувшаву. Барчаллагь зун лахъан къашайсса. Зул виричушивурттая жу буслантIиссару никирая никирайн, — увкунни ванал.
АьвдулхIамид Давудовлул бувсунни цала шяравучутурал Хъун дяъвилий дурсса гьурттушиндарая:
«Ккуллал райондалий яла чIиримунин ккаллисса Хъюйннал шярава дяъвилийн лавгун ур 39 инсан, миннава зана хьуну ур увагу 14. Ттул буттал буттал, АьвдулхIамид Давудовлул, бивтун бур дяъвилул щала ххуллу, дяъвилия махъгу талай ивкIун ур Дальний Востокрай японнал милитаристуращал. Шавай зана хьуну ур 1946 шинал ссуттил.
Ганал чIивима уссу Аьлибаг ливчIссар зана къавхьуминнавух, «- увкунни ванал.
КIицI лавгунни Дагъусттаннал дакьаврил фондрал цIакьсса аьдат душиву Ххувшаврил байрандалущал ветерантал барча буллалисса. Махъсса кIира шинал дянив «Зеленое яблоко» ттучаннал сетьгу хIала бувххун бур ва акциялувух. Миннал хъинсса ссайгъатру тIайла буккайсса бур ветерантуран.
«Ва ххуйсса лишанни – бизнесрал ва жяматийсса ккураннал вакилтал ихIсандалул давурттавух, социал проектирдавух хIала бухлай бушиву.
Мунил кабакьу бантIиссар граждан обществалул институт хьхьичIунмай баврин», — увкунни АьвдулхIамид Давудовлул.
Хъун дяъвилул ветерантурал барчаллагь увкунни хъамаллурахь, цахра дурсса къулагъасрахлу. ДакIнийн бивчунни дяъвилул лахIзарду ва тай шиннардил захIматшивуртту.
Нина Ивановна Сахнина дяъвилийн бувцуну бур 1942 шинал. БивкIун бур Цалчинмур Украиннал фронтрай связисткану. Гьуртту хьуну бур Союзрал ва Европанал чIявусса шагьрурдайсса талатавурттай, Польшанаву. Бивну бур Берлиннайн.
Мусса Багьауттинов гьуртту хьуну ур Ккавкказ буручлачисса талатавурттавух. Цалчинсса гьурттушинна хьуну дур Краснодардал крайрал Туапсе шагьру мурахас бавриву.
Галина Пономаревал дакIнийн бувтунни, цинма, чIивисса душнин, багьну бивкIшиву щавурду дирсса солдат дяъвилул цIарава буккан буллан. Февраль зурул 28-нний ванин там хьуну дур 100 шин.
«На цIанакулгу кумаг буллай бура инсантуран, дукра дуллай бура хьхьирунтран ва ччитран», — увкунни ванил.
Цинявппагу ветерантуран дуллунни бахшишру ва дукиялущалсса кьуцуртту.
Вайва гьантрай, Дагъусттаннал дакьаврил фондрал, республикалийсса коронавирусрал инфекция ппив хъанахъаврицIун дархIусса тагьаргу хIисавравун ларсун, дукиялийнусса кумагру бавчIунни ахIвал кIюласса кулпатирттайх ва мушакъатсса инсантурайх.
