[dropcap]Б[/dropcap]архъаллал шяравасса ХIаммаев ТIагьир 2012-ку шиная шихунай зий ур МахIачкъалаллал 1-мур азарханалий.
Андриана Аьбдуллаева
2001-ку шинал ва увххун ур дуклан Дагъусттаннал медициналул университетравун. Мукьилчинмур курсирая дуккаву къуртал дан лавгун ур Самардал военно-медицинский институтравун. Мунияр махъ травматолог-ортопеднал пиша лахьхьин Москавлив ординатуралувун увххун ур. Мяйра шин дур ТIагьирдул МахIачкъалалив шагьрулул цалчинмур азарханалий зий.
Коронавирусрал инфекция сукку шайхту, цува рязину, ва азаруннил къашавайсса инсантал хъин буллансса курсругу бувккуну, «ятIул зоналий» зий ур. ЧIявуми хIакинтал куна, цIу бутIуй ТIагьир цувагу къашай хьуну ур. Хъин хьуну махъ цIунилгу кIура авну ур цала пострайн. Апрель зурул ахирдания айивхьуну, цIанасса чIумалнин пульмонологиялул отделениялий «ятIул зоналий» зий ур.
— ЦIубутIуй жул азарханалийн миксса чIявусса къашайшалт бувцуну букIлай бия, ми уттубишин бансса кIанттурду бакъая жучIа. Ца кьинилул дянив жучIан 270 инсан увцуну бувкIуна. Учин ччива, на зузисса шагьрулул клиникалул азархана цIанасса чIумал ца яла ххуйну хIадур бувмур азарханар. Хъунама хIакин ХIажимурад Маллаевлул укунсса шартIирдай хIарачат бунни къашавайсса инсантуран кумаг бансса чаранну лякъин, бан шаймургу, ца ххишалагу бунни ванал. Цувагу цалчинмур кьинилия шихунай жул чIарату хIура къавхьунни, гьарица аьркинмунил кумаг буллай. Щукру Аллагьнайн, цIана цахъи бунугу къашайшалт чан хьунни. ЦIанасса чIумал ттучIа шанма палата бур, мукь-мукьа къашайшала усса. Бур хIакинтал цIанагу хъунмасса гуж багьну зузисса, — буслай ур ТIагьир ХIаммаев.
Ва оьвчаву дуллай ур жула агьалинайн, баччибакъулшиву мадулларду, щябикIияра шаппа, зувагу, зула гъан-маччамигу бурувччуну личIаншиврул тIий.
— Жула инсантурал баччибакъулшиву сававну ппив хьунни ва инфекция жула районнайх, щархъавух. Дахьра эпидемиологиялул низам баян бувсса чIумал, цинявппа нех дирхьуну шяраваллавун бавчунни. Му чIумал чIявуминнай инфекция диркIссар, так ялун лирчуну къадиркIссар. Азар ялун личиннин чIун хъуннасса лаглай дур. ЧIявусса къашайшалтрая ттун бавунни, бивкIулийн лавгун, микку лархъунни азар тIий. Ва инфекция дух дансса яла къулаймур чаран мури – биччибакъулшиву къадуллалаву, зула зува бурувччуну бикIаву.
