[dropcap]Б[/dropcap]юхттулсса Ххувшаврил 75 шинал юбилей къабювхъунни аьдат­равун дагьсса куццуй хьунадакьин. Дяъвилул балайрду, шадлугърал салютру, фронтовиктурал суратирттащалсса личIи-личIисса флешмобру нани бувну кIицI ларгунни агьалинал ва ххуллухсса Ххувшаврил байран.

---

 

Имара Саидова
[dropcap]М[/dropcap]ахIачкъалалив Ермошкина кIичIиравусса 50-ми къатрал залуннал цала чIирайн лархъсса фронтовиктурал суратру ххал хьуми миннуй тамаша къабувну чIарах буклай бакъая. Ва ххаллилсса даврил сиптачигу ия Читтурдал шярава­сса цIанихсса фото-художник, искусствовед Кьурбанов Каламадин ХIусайнович.

Махъсса ппурттуву хIасул хьу­­сса тагьарданийну цил багьайкун байран кIицI лагансса сант да­къашиврийн бувну, Каламадиннул цала кулпатращал пикри бувну бия Читтурдал шярава дяъвилийн лавгсса вирттаврал аьпа абад баву мурадрайсса даву дан.

«Жува цинявппагу буржлув­ссару жула ирсирахь жухлува талай бивкIминнал чувшивурттая буслан ва кьадрулий ппухълуннал тарих ябаву мурадрайсса давуртту дуллан», — тIий ур Каламадин.

[dropcap]В[/dropcap]айннал кулпатраву Ххувшаврил байран дур яла кьиматраймургу. Ватандалийн кьини дурксса чIумал чIирисса Читтурдал шярава дяъвилийн лавгун ур 50 жагьил, миннавух Каламадиннул буттагу, кIия буттауссу ва кIиягу нитти­уссугу. Зана хьуну ур так Каламадиннул ппу ХIусайн.
Дяъвилия махъ, пенсиялийн ­укканнин, Каламадиннул ппу, Рес­публикалул КРУ-лий ва финансирттал органнай зий, бусравну цала цIа кьариртсса инсан ур. Каламадингу ур му кунасса.
Бур ваначIа цалва салкьи буллай, бавтIсса шярава Ватан дуру­ччин лавгсса вирттаврал аьпалун хас бувсса авадансса тарих.

КIулссия Каламадин художниктурал даврин кьимат бищун бю­хъайсса инсан ушивугу. Ларгсса шинал ахирданий Тарихрал музейраву дурссия ванал 70 шинал юбилейран хас дурсса «Наш вернисаж» тIисса, 30-хъул шиннардий салкьи дуллай ивкIсса, Да­гъусттаннал цIанихсса художниктурал дурсса суратирттал ххаллилсса выставка. Ленинградрай суратирттал художествалул лавайми курсругу къуртал бувну, Каламадин фотокамералул объективрал кьюлтIшивуртту лахьхьин дуллай ивкIссар МахIакъалалив жагьилсса фотографтуран.

Жагьил­сса пишакар зий ивкIссар ДАССР-данул Бытовой обслуживаниялул министерствалучIасса Дуккаврил ва производствалул комбинатрайгу фотографтурахь дарсру дихьлай.

[dropcap]М[/dropcap]уния махъ зий ивкIссар Буйнакскаллал суратру рищай­сса филиалданул хъунаману, МахIачкъалаллал Дагфотообъединениялул бюрорал заведующийну. Тай шиннардий, цIана кунмасса фотоаппаратру, телефонну дакъасса чIумал, лакрал щархъавун суратру рищун мудан ванайнни оьвтIий бивкIсса. Зунттавунсса ххуллул архшиврух, цаява буклакисса харжирах къаурувгун, ва мудангу лагайсса ивкIссар.
Дагъусттаннай, Каламадин кунмасса, искусствалул кьимат бищун кIулсса коллекционертал, нажагьсса бакъа, бакъар.

[dropcap]Ж[/dropcap]ивописьрал искусствалул чулухунмайсса гъира ванаву чантI куну бур 1994 шинал Дубайлив суратирттал галереялуву зузисса чIумал. Муния махъ ванал МахIачкъалалив цалчин тIивтIуссар художниктурал произведенияртту цачIун бувсса «Вернисаж» тIисса галерея. Шикку ва хъунмасса захIмат бихьлай ур художниктурал давуртту машгьур дан. Каламадин цимилгу чIарав авцIуссар, спонсоршиву дурссар искусствалул аралувусса проектирдал. Му бакъассагу, ва ур «Чис­тое сердце» ихIсандалул проектрал Лакрал райондалул чулухунайсса ца яла хьхьичIунма вакил. Ряххунния лирчусса шиннардий ахIвал-хIал кIюласса кулпатир­ттал чIарав ацIаву мурадрайсса давурттавух чялишсса гьурттушинна дуллай ур.

Цаннил гьунар буманаву гьармунил гьунар бикIайссар тIисса махъру ванацIун бавкьу­сса бур. МахIаттал-махIасара хьун­сса музей сакин бувну бур ванал цала ичIува. Ванал ужагърай­сса музей бур буттахъая ирсирай дирмур, хьхьичIазаманнул кьай-кьуй ядуллалисса тарихрал ххазина. ЧIамурду дурну, ца низамрай дирхьуну дур шикку синааьрщарал, дувссилул, дукнилул тIахIни-кIичIу, багьу-бизулул кьай-кьуй. ЧIалай бур ванал ва эмаратсса, я батIин къашайсса музей сакин бан хъунмасса захIмат бивхьушиву. Цала музейрал личIисса мурцIу хас бувну бур буттал шярава Ватандалухлу талан лавгсса вирттавран. Музейравусса экспонатру цанния бувсун, ца кьабитансса бакъар.

Шиву бур И. В. Сталиннул 70 шинал юбилейран хасну итабавкьусса, мунал оьрмулия ва аьрали ххуллия чивчусса, нажагьсса луттирдал сериялува­сса, 8 ккило кIушиврул ду­сса лу. ХIасил, ва цагу, кIирагу шинай бувсса захIмат бакъар. Ва бур Каламадиннул бивтсса оьрмулул ирсирал ххуллу.

— Гьарица аьрххи-ххуллийн уккайхту, яру ливчуну икIайссияв ттула музей чIюлу бансса кьай-кьуй ххал дуллай, — буслай ур Каламадин.
Хьуссия ттул Каламадиннущал уттинингу жула кказитрай ихтилат, амма, цала пахру-ххара бакъашиврул, къабувсуна ванал цала караматсса музейрая.

Гьай-гьай, Каламадиннуща укун ххаллилсса давуртту дан хьуссар чIарав буну тIий гьарица давриву кабакьу буллалисса, зунсса гъира-шавкь рутлатисса ххирасса кулпат ПатIимат, душру Жамиля, Аьжа, Диана ва вайннал оьрчIру. Жамиля тIимур душ цуппагу бур гьунар бусса художник. Ванилгу, цила буттал кунма, тIивтIуну бур ххаллилсса суратирттал галерея.