[dropcap]Э[/dropcap]пидемиялуцIун дархIуну билаятрай хIасул хьусса тагьарданийн бувну, школардал гьашинусса выпускниктурансса Махъва-махъсса гюнгутIигу бивщунни онлайн-режимрай.
Май зурул 25-нний ва режимрай Махъва-махъсса гюнгутIи бивщунни ЦIуссалакрал райондалул школарттайгу.
Имара Саидова
Къабювхъунни выпускниктураща цанма ххирасса учительтурайн хъямала багьан, кувннащал кув хьунабакьин. Цуксса хIайпнугу, пандемия сававну, выпускниктурал оьрмулуву яла дакIний личIаймур кьинисса шадлугъ хьунни онлайн-режимрай. БувчIлай бур укун къуццу тIун багьлай бушиву оьрчIал цIуллушивручIан дуркIсса цичIав дакъашиврийн бувну.
Выпускниктурал ччянива хIадур бувну бия школа къуртал баврицIун бавхIусса, учительтурахь барчаллагь тIутIисса личIи-личIисса флешмобру.
Ва кьини кIюрххил видеолабизарттайну оьрчIру барча буллалисса ва учительтурал коллективрахь, оьрчIал нитти-буттахь барчаллагь тIутIисса ихтилат бунни ЦIуссалакрал райондалул бакIчи МахIаммад-ХIажи Айдиевлул.
— Хъуннасса ххаришиву дикIай жула выпускниктурая ххуйсса хаварду бавсса чIумал. Вихну ура зуягу ЦIуссалакрал райондалул школарттал цIа бюхттул дансса пишакартал хьуншиврийн. Гьай-гьай, оьрмулул ххуллий хьунадакьлантIиссар захIматшивурттугу, миннул хьхьичI ник къарирщуну, зува бувгьусса ххуллийх кьянкьану бачинсса кьудрат дулуннав зухьхьун. ДакIний битияра, зу школалия лавгун махъгу, жу мудангу хIадурну буссару зухь махъ бусан, маслихIат бан, чIарав бацIан. Илкинсса хьуннав зул ххуллу, — увкунни Хl. Айдиевлул.
Хъирив вара режимрай выпускниктал барча бунни райондалул бакIчинал хъиривчу ХIажи ХIажиевлул ва райондалул КIулшивуртту дулаврил управлениялул хъунмур Светлана Къудаевал.
